پاکستان ایئر فورس ٹریننگ بیس میانوالی پر دہشتگرد حملہ ناکام

پاکستان ایئر فورس ٹریننگ ایئر بیس میانوالی پر دہشت گردوں کا حملہ ناکام بنا دیا گیا۔

پاک فوج کے شعبۂ تعلقاتِ عامہ (آئی ایس پی آر) کے مطابق بروقت کارروائی کے نتیجے میں 3 دہشت گرد مارے گئے۔

آئی ایس پی آر کے مطابق 3 دہشت گردوں کو ایئر بیس میں داخلے سے پہلے ہی ہلاک کیا گیا جبکہ باقی 3 دہشت گردوں کو گھیرے میں لے لیا گیا۔

اس دوران جوانوں نے اثاثوں کی حفاظت کو یقینی بنایا، کلیئرنس آپریشن آخری مراحل میں ہے۔

آئی ایس پی آر نے بتایا ہے کہ حملے میں پہلے سے گراؤنڈ کیے گئے 3 طیاروں اور فیول باؤزر کو نقصان پہنچا ہے۔

پاک فوج کے شعبۂ تعلقاتِ عامہ کا یہ بھی کہنا ہے کہ مشترکہ کلیئرنس اور کومبنگ آپریشن آخری مراحل میں ہے۔

آئی ایس پی آر کی جانب سے کہا گیا ہے کہ پاک فوج ہر قیمت پر ملک سے دہشتگردی کے خاتمے کے لیے پُرعزم ہے۔

پاک فوج کو خراجِ تحسین
نگراں وزیرِ اعلیٰ پنجاب محسن نقوی نے میانوالی ایئر بیس پر دہشت گرد حملے کو ناکام بنانے پر بہادر سپوتوں کو خراجِ تحسین پیش کیا ہے۔

محسن نقوی کا کہنا ہے کہ سیکیورٹی فورسز نے بروقت کارروائی کر کے دہشت گردوں کے مذموم عزائم کو ناکام بنایا، سیکیورٹی فورسز کے بہادر جوانوں کو سلام پیش کرتے ہیں۔

نگراں وزیرِ اعلیٰ محسن نقوی نے کہا ہے کہ حملہ ناکام بنانے والے سیکیورٹی فورسز کے جوان قوم کے ہیرو ہیں۔