پاک، ویسٹ انڈیز سیریز: شائقین کواسٹیڈیم آنے کی اجازت

عالمی وبا کورونا وائرس سے بچاؤ کے لئے عائد کردہ پابندیوں کے بعد پہلی مرتبہ پاک ویسٹ انڈیز سیریز میں نیشنل اسٹیڈیم میں تماشائیوں کو آنے کی اجازت ہوگی، پی سی بی کی درخواست پر این سی او سی نے 100فیصد گنجائش کے مطابق شائقین کو اسٹیڈیم آنے کی اجازت دے دی۔

ذرائع کے مطابق پاکستان کرکٹ بورڈ (پی سی بی )کی درخواست پرنیشنل کمانڈ اینڈ کنٹرول سینٹر نے پاکستان سپر لیگ کی پاک ویسٹ انڈیز سیریز کے لئے شائقین کو 100فیصد گنجائش کے مطابق کراچی اسٹیڈیم آنے کی اجازت دے دی ہے۔ پاکستان سپر لیگ میں تماشائیوں کو اجازت دینے کا باضابطہ اعلان دسمبر کے تیسرے ہفتے میں کیا جائے گا۔

یہ بھی پڑھیے

سچا پاکستانی ہونے کے لئے کرکٹ کو سپورٹ کرنا اہم ہے، گیلپ سروے

میتھیو ہیڈن کا پاکستانی کرکٹ ٹیم کے لیے اردو میں جذباتی پیغام

ذرائع کا کہنا ہے کہ 13 سے 22 دسمبر تک شیڈول ٹی ٹوئنٹی اور ون ڈے سیریز کے ٹکٹس کی فروخت جمعے سے شروع ہونے کا امکان ہے، سب سے مہنگا ٹکٹ ایک ہزار روپے کا رکھا جائے گا،500 اور 250 روپے کے ٹکٹس بھی دستیاب ہوں گے۔

ویکسی نیشن کرانے والے 12 سال تک کے بچے بھی اہل خانہ کے ساتھ اسٹیڈیم آکر میچ سے لطف اندوز ہوسکیں گے۔این سی او سی کی طرف سے جاری کردہ ہدایات کے تحت تماشائیوں کو میچ کے دوران ماسک لگانا ضروری ہوگا۔ کووڈ پروٹوکول کی پالیسی پرعمل درآمد لازمی قرار دیا گیا ہے۔واضح رہے کہ ویسٹ انڈیز کی ٹیم 9 دسمبر کو کراچی پہنچ رہی ہے۔ سیریز میں 3 ٹی ٹوئنٹی اور اتنے ہی ایک روزہ میچز کھیلے جائیں گے۔ کورونا کی صورتحال میں تماشائیوں سے بھرے اسٹیڈیم میں ہونے والی یہ پہلی سیریز ہوگی۔