آئی ایم ایف سے مذاکرات کا پہلا نتیجہ، نیپرا نے بجلی مہنگی کردی

آئی ایم ایف سے مذاکرات کا پہلا نتیجہ سامنے آ گیا، نیپرا نے ملک بھر میں بجلی کی قیمتوں میں اضافہ کر دیا، بجلی کے فی یونٹ کی قیمت 2 روپے 87 پیسے بڑھ گئی۔

نیپرا نے کے الیکٹرک کو بھی ماہانہ ایڈجسٹمنٹ کی مد میں اضافے کی منظوری دے دی، کے الیکڑک کے لیے بجلی 4 روپے 83 پیسے فی یونٹ مہنگی ہوگی۔

کراچی کے صارفین پر 7 ارب 87 کروڑ روپے سے زائد کا بوجھ پڑے گا، اضافہ مارچ کی ماہانہ فیول ایڈجسٹمنٹ کی مد میں کیا گیا ہے۔

نیپرا اتھارٹی اعداد و شمار کا جائزہ لینے کے بعد تفیصلی فیصلہ جاری کرے گی، کے الیکٹرک حکام کا کہنا ہے کہ ایل این جی کی قلت سے فرنس آئل والے پلانٹس چلائے گئے۔

کے الیکٹرک کے مطابق ایندھن کی قیمتیں بڑھنے سے چار ارب روپے سے زائد کا بوجھ پڑا۔

نیپرا حکام نے کہا کہ میرٹ آرڈر کی خلاف ورزی سے ایک ارب 14 کروڑ روپے سے زائد جبکہ گیس کی کمی سے ایک ارب 13 کروڑ روپے سے زائد کا بوجھ پڑا۔

کراچی کے صارفین کو جون کے بلوں میں اضافی ادائیگی کرنا ہوگی۔