نارتھ ناظم آباد تھانے سے 3 مغوی بازیاب، 2 برطرف اہلکاروں سمیت 5 ملزم گرفتار
اینٹی وائلنٹ کرائم سیل کا تھانے کی چھت پر چھاپہ، بطور تاوان وصول کیے گئے 4 لاکھ روپے بھی برآمد، قائد آباد کے رہائشی نوجوانوں کو سستا کالا بچھو دینے کے بہانے بلواکر 22 مارچ کو اغوا کیا گیاتھا۔
اینٹی وائلنٹ کرائم سیل نے نارتھ ناظم آباد تھانے پر چھاپہ مار کر تین مغویوں کو بازیاب کروا کر دو برطرف پولیس اہلکاروں سمیت 5 ملزمان کو گرفتار کر لیا۔
ملزمان نے تین نوجوانوں کو اغوا کر کے 50 لاکھ روپے تاوان طلب کیا تھا ۔
یہ بھی پڑھیے
ڈی ایچ اے موبائل شاپس پر ڈکیتی کرنے والے سابق رینجرز اہلکار سمیت 3 ملزمان گرفتار
اوباش نوجوانوں سے سی ویو تا دو دریا سڑک کو فیملیز کیلیے نوگوایریا بنادیا
اینٹی وائلنٹ کرائم سیل(اے وی سی سی ) نے نارتھ ناظم آباد تھانے کی چھت پر چھاپہ مار کر وہاں قید تین مغویوں کو بازیاب کروا لیا ۔اے وی سی سی کے مطابق گرفتار ملزمان میں برطرف پولیس اہلکار محبوب اور آصف انکے ساتھی مختار، اسد، ریاض اور کاشف شامل ہیں۔
نارتھ ناظم آباد تھانے میں عید کا خرچہ نکالنے کیلئے پولیس اہلکاروں نے 3 نوجوانوں کو اغواء کرکے کے تھانے کی چھت پہ رکھا اور اہلخانہ سے 50لاکھ تاوان مانگا ، ابھی ایس ایس پی سینٹرل معروف عثمان صاحب آنکھ ملتے جاگیں گے اور خبر دیں گے کہ سینٹرل پولیس کی کاروائی 6 گداگر گرفتار
— Faizullah Khan فیض (@FaizullahSwati) March 24, 2023
ملزمان نے قائد آباد کے رہائشی عصمت ،شعیب اور سلیم کو 22 مارچ کو اغوا کیا تھا،مغویوں کو سستا کالا بچھو دینے کے بہانے بلوایا گیا تھا اور پھر اغوا کر کے تھانے کی چھت پر واقع کمرے میں قیدکردیاگیا تھا۔
ملزمان نے مغویوں کے اہل خانہ سے رہائی کے عوض 50 لاکھ روپے کا مطالبہ کیا تھا اور پانچ لاکھ روپے میں معاملات طے ہوئے تھے۔ مغویوں کے اہل خانہ چار لاکھ روپے تاوان کی رقم ادا کر چکے تھے جو چھاپہ مار کارروائی میں برآمد کر لی گئی ہے
ایس ایس پی سینٹرل معروف عثمان نے تھانے سے مغویوں کو بازیابی پر نوٹس لیتے ہوئے ایس ایچ او نارتھ ناظم آباد سب انسپکٹر معید کو فوری طور پر معطل کر کے عہدے میں تنزلی کے احکامات جاری کیے ہیں۔
