ٹرین میں اجتماعی زیادتی کےدوران خاتون کی وڈیو بنانے کا بھی انکشاف

بہا الدین زکریا ایکسپریس میں خاتون سے مبینہ اجتماعی زیادتی کے دوران ملزمان کی جانب سے وڈیو بنانے کا بھی انکشاف ہوا ہے۔

میڈیا رپورٹس کے مطابق جوڈیشل مجسٹریٹ جنوبی کراچی کی عدالت میں بہاالدین زکریا ایکسپریس میں خاتون سے مبینہ زیادتی کیس کی سماعت ہوئی۔ تفتیشی افسر نے عدالت کو بتایا کہ ملزمان نے مبینہ اجتماعی زیادتی کی ویڈیو بھی بنائی تھی، ملزمان کے موبائل فون اور ویڈیوز برآمد کرنی ہیں۔

یہ بھی پڑھیے

زکریا ایکسپریس میں خاتون سے زیادتی، ریلوے حکام کا نوٹس، دو ملزمان گرفتار

جہلم میں حاملہ خاتون سے اجتماعی زیادتی کرنیوالے پانچوں ملزم محلے دار نکلے

عدالت نے گرفتار 5 ملزمان کے جسمانی ریمانڈ میں 2 دن کی توسیع کر دی۔ پولیس کا کہنا ہے کہ ملزمان نے 28 مئی کوملتان سے کراچی آنے والی خاتون کے ساتھ اجتماعی زیادتی کی،گرفتار ملزمان میں محمد زاہد،عاقب منیر، ذوہیب، عامر رضا اور عبد الحفیظ شامل ہیں۔

ملزمان کے خلاف سٹی ریلوے پولیس اسٹیشن میں مقدمہ درج ہے۔ متاثرہ خاتون عدالت میں دو ملزمان کو شناخت بھی کرچکی ہے۔پولیس نے شناخت پریڈ کے لیے ملزم کے ہمراہ دس ڈمی ملزمان پیش کیے تھے۔

 متاثرہ خاتون نے عدالت میں بیان دیا کہ ملزمان نے 27 مئی کو زکریہ ایکسپریس میں اجتماعی زیادتی کا نشانہ بنایا جس کے بعدعدالت نے شناخت پریڈ کی رپورٹ کو مقدمے کا حصہ بنا دیا۔

دریں اثنا پاکستان ریلویز نے اجتماعی زیادتی کا نشانہ بننے والی 25 سالہ خاتون کو ملازمت دینے کا فیصلہ کیا ہے۔ڈان اخبار کی رپورٹ کے مطابق پاکستان ریلویز نے دو بچوں کی متاثرہ  ماں کو معاوضہ دینے کا فیصلہ بھی کیا ہے۔

وزیر ریلوے خواجہ سعد رفیق نے خاتون سے ٹیلی فونک رابطہ کیا اور انہیں یقین دہانی کروائی کہ محکمہ ان کے مکمل تعاون کرے گا۔ترجمان ریلوے کے مطابق  سعد رفیق نے متاثرہ خاتون سے کہا کہ  ہم آپ سے مکمل تعاون کریں گے اور آپ کو اکیلا نہیں چھوڑیں گے، ہم نے سینیئر خاتون فوکل پرسن کا تقرر کیا ہے جو آپ معاملے پر آپ سے بات چیت کریں گی۔