کراچی: فون پر دوستی کے بعد اغوا برائے تاوان کرنیوالی خاتون گینگ سمیت گرفتار

سندھ پولیس کےمحکمہ انسداد دہشت گردی(سی ٹی ڈی)   نے کراچی میں فون پر دوستی کے بعد لوگوں کو اغوا برائے تاوان کرنے والی  گینگ کی خاتون سرغنہ اپنے 3 ساتھیوں سمیت دھرلی گئی۔

سینئر کرائم رپورٹ افضل ندیم ڈوگر کے مطابق سی ٹی ڈی کے  شعبہ تفتیش کے انچارج چوہدری غلام صفدر کے مطابق گرفتار ملزمان میں سجاد خان، محمد ارباز، سلمان اور ایک خاتون شنو شامل ہیں۔

یہ بھی پڑھیے

کراچی سےلڑکیوں کی بیرون ملک اسمگلنگ کا انکشاف، ہائیکورٹ کا تحقیقات کاحکم

کراچی میں اسٹریٹ کرمنلز نے ماں سے 11دن کی بچی چھین لی

غلام صفدر کے مطابق گرفتار ملزمہ شنو مختلف افراد کو فون کر کے ان سے دوستی کرتی تھی اور پھر منصوبہ بندی کے تحت انہیں ملنے کے لیے مخصوص مقامات پر بلوا لیتی تھی۔

ہنی ٹریپ میں ملوث شنو گینگ کی سرغنہ سمیت 4 ملزمان کراچی سے گرفتار
تین جعلی سی ٹی ڈی اہلکار سجاد خان، ارباز اور سلمان بھی پکڑے گئے۔
ملزمہ شنو فون پر لڑکوں سے دوستی کرکے منصوبہ بندی کے تحت مخصوص جگہ پر بلاتی تھی، تین ساتھی پکڑ کر رقوم وصول کرتے تھے۔ pic.twitter.com/WYmAY9X9Mr

— Afzal Nadeem Dogar (@GeoDogar) December 11, 2022

ان مقامات پر اس کے دیگر ساتھی ملزمان سی ٹی ڈی کے اہلکار بن کر چھاپہ مار کارروائی کرتے اور دونوں کو حراست میں لے کر اغوا کر لیتے تھے، ملزمان اس دوران دکھاوے کے طور پر لڑکی اور اس کے دوست کو بلیک میل کرتے تھے، اصل مقصد مرد کو بلیک میل کر کے بھاری رقوم اینٹھنا ہوتا تھا۔

غلام صفدر کے مطابق ملزمان نے حال ہی میں شمائل نامی نوجوان کو اغوا کیا اور اسے رہا کرنے کے عوض 2 لاکھ روپے وصول کیے، جب کہ ملزمان اس سے طے شدہ مزید 7 لاکھ روپے وصول کرنے کے لیے الفلاح کے علاقے میں پہنچے تو سی ٹی ڈی کی پولیس پارٹی نے گرفتار کرلیا۔واقعے کا مقدمہ الفلاح تھانے میں اغوا برائے تاوان اور بھتہ خوری کی دفعات کے تحت درج کرلیا گیا ہے۔