پی سی بی اور کھلاڑیوں کے ناقد رمیز راجہ کا امتحان

قومی  کرکٹ  ٹیم  کے  سابق  کھلاڑی رمیز راجہ نے پاکستان کرکٹ بورڈ (پی  سی  بی) میں بورڈ آف گورنرز کے رکن کی حیثیت سے اپنی ذمہ داریاں سنبھال لی ہیں۔ رمیز راجہ نے کہا ہے کہ ان کا امتحان شروع ہوگیا ہے، اب انہیں بھی تنقید کا سامنا کرنا پڑ سکتا ہے۔

پچھلے دنوں وزیراعظم عمران خان نے قومی کرکٹ ٹیم کے سابق کھلاڑی رمیز راجہ اور اسد علی خان کو پی سی بی میں بورڈ آف گورنرز کے ممبرز کی حیثیت سے نامزد کیا تھا۔ احسان مانی کے مستعفی ہونے پر رمیز راجہ کے چیئرمین پی سی بی بننے کے امکانات بھی روشن ہوگئے ہیں۔

سماجی رابطوں کی ویب سائٹ ٹوئٹر پر رمیز راجہ نے لکھا کہ ان کی زندگی اب بدل چکی ہے۔ پہلے وہ ایک کمنٹیٹر کی حیثیت سے لوگوں پر تنقید کرتے تھے لیکن اب وہ لوگوں کی تنقید کا نشانہ بن سکتے ہیں۔ انہوں نے لکھا کہ وہ اپنے مداحوں کے تعاون اور دعاؤں سے اپنی ذمہ داریاں بہتر طریقے سے نبھانے میں کامیاب ہوں گے۔

Life has changed a bit since my last tweet. From bowling bouncers to facing bouncers but with your support and blessings I am confident to win the day inshallah.

— Ramiz Raja (@iramizraja) August 28, 2021

یہ  بھی  پڑھیے

کرسٹیانو رونالڈو کی 12 سالوں کے بعد مانچسٹر یونائیٹڈ میں واپسی

رمیز راجہ کی ٹوئٹ پر صارفین ان کے لیے نیک خواہشات کا اظہار کررہے ہیں۔ صارف سید اختر نے لکھا کہ ہماری دعائیں آپ کے ساتھ ہیں۔ خدا آپ کو ہمت دے اور ایمانداری سے کام کرنے کی توفیق عطا فرمائے۔

ہماری دعائیں آپ کے ساتھ ہیں اللہ تعالی آپ کو ہمت بخشے اور ایمانداری سے کام کرنے کی توفیق عطا فرمائے آئے

— Syed Akhtar (@SyedAkh40809852) August 28, 2021

قومی  ٹیم  کے  سابق  کھلاڑی راشد لطیف نے رمیز  راجہ کو مخاطب ہوتے ہوئے لکھا کہ پہلے آپ توپ کے اوپر بیٹھے ہوئے تھے جہاں آپ کھلاڑیوں اور انتظامیہ کو سخت تنقید کا نشانہ بناتے تھے لیکن اب آپ توپوں کے آگے ہیں۔

رمیز بھائی پہلے آپ توپ کے اوپر بیٹھے ہوئے تھے اور اب توپوں کے آگے ۔ اللہ تعالی اپ کو کامیاب کرے آمین

— Rashid Latif 🇵🇰 (@iRashidLatif68) August 29, 2021

واضح رہے کہ رمیز راجہ کو 3 سالوں کے لیے بورڈ آف گورنرز کا ممبر بنایا گیا ہے جس کا نوٹیفکیشن بھی جاری کردیا گیا ہے۔