شہریار آفریدی اور فیاض الحسن چوہان بھی گرفتار، شیخ رشید بچ نکلے

اسلام آباد اور راولپنڈی پولیس نے پاکستان تحریک انصاف کے رہنما، سابق وفاقی وزیر اور کشمیر کمیٹی کے سابق چیئر مین شہریار آفریدی  اور سابق صوبائی وزیر فیاض الحسن چوہان کو گرفتار کرلیا۔

دوسری  جانب سابق وفاقی وزیرداخلہ اور عوامی مسلم لیگ کےسربراہ شیخ رشید اور ان کےبھتیجے تحریک انصاف کے سابق رکن قومی اسمبلی شیخ راشد شفیق  لال حویلی پر چھاپے کے دوران گرفتاری سے بچ نکلے۔

یہ بھی پڑھیے

وزیر اعظم کا شرپسندی میں ملوث افراد کو 72 گھنٹوں میں گرفتار کرنے کا حکم

لاہور ہائی کورٹ کا بڑا فیصلہ: ڈاکٹر یاسمین راشد کی گرفتاری کا نوٹی فیکیشن کالعدم قرار

اسلام آباد پولیس کے مطابق شہریار آفریدی کو سیکٹر ایف 8 سے نقض امن کےخطرے کے پیش نظر ایم پی او ایکٹ کے تحت  گرفتار کیا گیا ہے۔سابق وفاقی وزیر اور تحریک انصاف کے رہنما مراد سعید نے دعویٰ کیا  ہے کہ شہریار آفریدی کو آدھی رات کو اہلیہ سمیت اغوا کیا گیا ہے جبکہ  ان کی
جواں سال بیٹیوں کوبری زدوکوب بھی کیا گیا ہے۔

سابق وفاقی وزیر برائے داخلہ/ چئیرمین کشمیر کمیٹی کو آدھی رات کو اہلیہ سمیت اغوا کرلیا گیا ہے۔ جواں سال بیٹیاں جو اپنے ماں باپ کی مدد کے کیے لپکیں ان کو بھی بری طرح زدوکوب کیا گیا ہے۔ کل تک ہم فلسطین اور کشمیر کو لیکر ایسی باتیں سنتے تھے۔ آج اپنی سرزمین پر ہماری بہن بیٹیاں اپنی…

— Murad Saeed (@MuradSaeedPTI) May 16, 2023

قبل ازیں پولیس نے پی ٹی آئی رہنما فیاض الحسن چوہان کو بھی مری روڈ لیاقت باغ سے گرفتار کیا۔فیاض الحسن چوہان کے خلاف 9 مئی کو تھانہ صادق آباد میں مقدمہ درج کیا گیا تھا، اْن پر جلاؤ گھیراؤ اور کارکنوں کو اکسانے کا الزام ہے۔

سابق وفاقی وزیر داخلہ شیخ رشید احمد کی لال حویلی راولپنڈی میں شیخ رشید اور راشد شفیق کی گرفتاری کے لیے ایلیٹ فورس داخل ہوگئی pic.twitter.com/ugpzHvhsrz

— Sheikh Rashid Ahmed (@ShkhRasheed) May 15, 2023

دوسری جانب راولپنڈی میں شیخ رشید اور ان کے بھتیجے شیخ راشد شفیق کی گرفتاری کیلئے لال حویلی پر پولیس کا دوسرا چھاپہ بھی رائیگاں گیا۔شیخ رشید کی گرفتاری کیلیے لال حویلی پر چھاپے کی سی سی ٹی وی فوٹیج بھی سامنے آگئی۔

شیخ رشید نے ایک وڈیو بیان میں بتایا کہ” ایلیٹ اور فورسز کے سیکڑوں اہلکار لال حویلی  میں داخل ہوگئے ہیں، یہ مجھے اور راشد شفیق کو گرفتار
کرنا چاہتے ہیں، انہوں نے اسلام آباد میں بھی کارروائی کرنے کی کوشش کی ہے“۔

pic.twitter.com/DrxL1TxOQM

— Sheikh Rashid Ahmed (@ShkhRasheed) May 15, 2023

انہوں نے سوال کیا کہ”یہ چادر اور چار دیواری کا احترام ہے؟ہم کسی توڑ پھوڑ میں شریک نہیں ،ہم امن ، اصول اور دیانتداری سے سیاست کرتے ہیں،مگر یہ بدنصیبی ہے کہ حالات کو جان بوجھ کر خراب کیا جارہا ہے اور ان کی خواہش ہے کہ ہم کام اور وہ بات کریں جس سے قومی نقصان ہو،مگرہم مر جائیں گے لیکن قومی نقصان نہیں کریں گے“۔

انہوں نے کہاکہ”سیاست میں ہم عمران خان کے ساتھ ہیں، اگر اس جرم میں ہماری گرفتاری ہوتی ہے تو میں اور راشد شفیق دونوں گرفتاری کیلیے تیار ہیں، لال حویلی میں توڑ پھوڑسراسر زیادتی ، غیرقانونی اور غیر آئینی ہے، ہم صرف قوم کو یہ بتانا چاہتے ہیں کہ ہمارا جرم یہ ہے کہ ہم کبھی بھی کسی توڑ پھوڑ میں، کسی بھی غیرقانونی کام میں کبھی شریک نہیں ہوئے،  لیکن اصولوں کی سیاست کی ہے ،اصولوں کے ساتھ کھڑے تھے اور کھڑے رہیں گے“۔