عمران خان نے چیئرمین نیب کے خلاف سپریم جوڈیشل کونسل میں ریفرنس دائر کردیا

چیئرمین نیب لیفٹیننٹ جنرل (ر) نذیر احمد کیخلاف قانونی چارہ جوئی کا معاملہ۔ چیئرمین تحریک انصاف عمران خان نے چیئرمین نیب کیخلاف سپریم جیوڈیشیل کونسل سے رجوع کرتے ہوئے ان کے خلاف باقاعدہ درخواست دائر کر دی ہے۔

تفصیلات کے مطابق چیئرمین تحریک انصاف عمران خان نے چیئرمین نیب کیخلاف سپریم جیوڈیشیل کونسل سے رجوع کرلیا۔ عمران خان نے چیئرمین نیب کیخلاف سپریم جیوڈیشل کونسل میں باضابطہ درخواست دائر کردی ہے۔

درخواست آئین کے آرٹیکل 209 اور نیب آرڈیننس کے سیکشن 6 کے تحت دائر کی گئی ہے۔

عمران خان کی جانب سے دائر کی گئی درخواست میں موقف اختیار کیا گیا ہے کہ چیئرمین نیب نے یکم مئی کو چھٹی والے دن میری گرفتاری کے وارنٹس جاری کئے، چیئرمین نیب نے چھٹی والے روز جاری کئے گئے وارنٹس کو 8 روز تک چھپائے رکھا۔

یہ بھی پڑھیے

یہ 2 ماہ میں الیکشن نہیں کراسکتے، الیکشن میں ہی کرواؤں گا، آصف زرداری

لاہور ہائیکورٹ نے عمران خان کی ظل شاہ کیس میں ضمانت قبل از گرفتاری کی توثیق کردی

چیئرمین تحریک انصاف عمران خان کی جانب سے دائر کی گئی درخواست میں کہا گیا ہے کہ القادر ٹرسٹ کی انکوائری کو انوسٹیگیشن میں بدلے جانے کے بارے میں مجھے جان بوجھ کر نہیں بتایا گیا، انکوائری کے انوسٹیگشن میں بدلے جانے کے معاملے کو خفیہ رکھنا نیب قانون کی خلاف ورزی ہے۔،

چیئرمین نیب لیفٹیننٹ جنرل (ر) نذیر احمد کیخلاف قانونی چارہ جوئی کا معاملہ

چیئرمین تحریک انصاف عمران خان نے چیئرمین نیب کیخلاف سپریم جیوڈیشیل کونسل سے رجوع کرلیا

چیئرمین نیب کیخلاف سپریم جیوڈیشل کونسل میں باضابطہ درخواست دائر

درخواست آئین کے آرٹیکل 209 اور نیب آرڈیننس کے… pic.twitter.com/G5O9lMrVxT

— PTI (@PTIofficial) June 7, 2023

پی ٹی آئی کے سربراہ کی جانب سے دائر کی گئی درخواست میں یہ بھی موقف اختیار کیا گیا ہے کہ وارنٹس گرفتاری نیب آرڈیننس کے سیکشن 24 کی خلاف ورزی کرتے ہوئے جاری کئے گئے، وارنٹس گرفتاری کی تعمیل اور رینجرز کے ذریعے میری گرفتاری بھی مکمل طور پر غیرقانونی تھی۔

دائر درخواست میں موقف اختیار کیا گیا ہے کہ سپریم کورٹ نے 11 مئی کے اپنے حکمنامے میں بھی وارنٹس کی تعمیل اور میری رینجرز کے ذریعے گرفتاری کے سارے عمل کو غیرقانونی قرار دیا۔

درخواست میں کہا گیا ہے کہ چیئرمین نیب مجھے آئینِ پاکستان کے تحت میسّر بنیادی حقوق سے محروم کرنے کے بھی مرتکب ہوئے ہیں۔

تحریک انصاف کے سربراہ کی جانب سے دائر درخواست میں موقف اختیار کیا گیا ہے کہ چیئرمین نیب نے دستور کے آرٹیکل 9, 10, 10-اے اور 14 کے تحت میرے حقوق غصب کئے، چیئرمین نیب کے تمام اقدامات بدنیتی پر مبنی تھے۔

درخواست میں موقف اختیار کیا گیا ہے کہ چیئرمین نیب نے اپنے اختیارات کا غلط استعمال کیا اور میرے خلاف غیرآئینی و غیرقانونی کارروائی میں ملوث رہے، چیئرمین نیب لیفٹیننٹ جنرل (ر) نذیر احمد سنگین مِس کنڈکٹ اور اپنے کوڈ آف کنڈکٹ کی خلاف ورزی کے مرتکب ہوئے ہیں۔

درخواست میں مزید کہا گیا ہے کہ چیئرمین نیب منصب پر برقرار رہنے کے اہل نہیں رہے، چیئرمین نیب کو فوری طور پر منصب سے معزول کیا جائے۔

یاد رہے کہ اس سے قبل چیئرمین تحریک انصاف عمران خان ، چیئرمین نیب لیفٹیننٹ جنرل (ر) نذیر احمد کیخلاف ہتکِ عزّت کی کارروائی کا آغاز بھی کر چکے ہیں۔ عمران خان نے لیفٹیننٹ جنرل (ر) نذیر احمد کو یکم جون کو 15 ارب کے ہرجانے کا نوٹس بھجوایا تھا۔