القادر اور توشہ خانہ کیسز میں عمران خان اور بشریٰ بی بی کی عبوری ضمانت میں توسیع

احتساب عدالت نے 190 ملین پاؤنڈ القادر ٹرسٹ کرپشن اور توشہ خانہ کیسز میں پی ٹی آئی چیئرمین عمران خان اور ان کی اہلیہ بشریٰ بی بی کی عبوری ضمانت میں 31 جولائی تک توسیع کردی۔

احتساب عدالت کے جج نے بشریٰ بی بی کی آج کی حاضری سے استثنیٰ کی درخواست بھی منظور کرلی۔

احتساب عدالت کے جج کے استفسار پر عمران خان کے وکیل بیرسٹر گوہر نے عدالت کو بتایا کہ سینئر وکیل خواجہ حارث سپریم کورٹ میں ہیں اور پھر انہیں ہائی کورٹ جانا پڑا۔

یہ بھی پڑھیے 

پاکستان بھر میں شدید بارشوں سے 150 افراد جاں بحق جبکہ 233 زخمی ہوئے، این ڈی ایم اے

چین نے پاکستان کا 2 ارب 10 کروڑ ڈالر کا رول اوور کردیا

جج محمد بشیر نے کیس کی سماعت کل تک ملتوی کرنے کی تجویز دی۔

بیرسٹر گوہر نے کہا کہ سپریم کورٹ کی ہدایت کے مطابق انہیں کل ہائی کورٹ میں پیش ہونا ہے۔ اس کے بعد محرم کی تعطیلات آجائیں گی۔ اس لیے عدالت سے استدعا ہے کہ وقفے میں مزید تاخیر کی جائے۔

بعدازاں احتساب عدالت نے عبوری ضمانت میں 31 جولائی تک توسیع کرتے ہوئے کہا کہ فریقین کو 31 جولائی کو عبوری ضمانت پر حتمی دلائل دینا ہوں گے۔

پی ٹی آئی کے سربراہ اپنے وکلا کے ہمراہ احتساب عدالت میں پیش ہوئے۔ حاضری لگانے کے بعد انہیں جانے دیا گیا۔