مسلم لیگ ن اور پیپلز پارٹی نے نگراں وزیراعظم کے لیے 5 نام شارٹ لسٹ کردیئے ہیں، خواجہ محمد آصف

وزیر دفاع خواجہ آصف نے اس بات کی تصدیق کی ہے کہ دو بڑی اتحادی جماعتوں پاکستان پیپلز پارٹی (پی پی پی) اور پاکستان مسلم لیگ نواز (پی ایم ایل این) نے مشترکہ طور پر نگراں وزیراعظم کے عہدے کے لیے پانچ ناموں کو شارٹ لسٹ کیا ہے۔

اس بات کا انکشاف خواجہ آصف نے ایک حالیہ انٹرویو کے دوران کیا۔

انہوں نے کہا کہ شارٹ لسٹ کیے گئے ناموں کا فیصلہ ابھی تک پی پی پی اور مسلم لیگ (ن) کے درمیان ہوا ہے اور انہوں نے ایک سیاستدان کو عبوری وزیر اعظم مقرر کرنے پر اتفاق کیا ہے۔

یہ بھی پڑھیے 

چیئرمین تحریک انصاف عمران خان نے سائفر کی حقیقت کھول کردی

پاکستان پیپلز پارٹی نے نگراں وزیراعظم کے نام کے حوالے چلنے والی خبروں کو فیک قرار دے دیا

انہوں نے امید ظاہر کی کہ شارٹ لسٹ کئے گئے ناموں میں سے ایک نام کو ایک ہفتے کے اندر فائنل کر لیا جائے گا اور دیگر اتحادیوں سے ان کے ان پٹ اور توثیق کے لیے مشاورت کی جائے گی۔

وزیر دفاع نے کہا کہ مشاورت کے اہم مرحلے میں پاکستان ڈیموکریٹک موومنٹ (پی ڈی ایم) اور جمعیت علمائے اسلام-فضل (جے یو آئی ف) کے سربراہ مولانا فضل الرحمان کے ساتھ بھی بات چیت ہوگی۔

انہوں نے یہ بھی کہا کہ حتمی فیصلہ پی ڈی ایم کے سربراہ سے مشاورت کے بعد کیا جائے گا۔

وزیر دفاع خواجہ محمد آصف نے مزید کہا کہ وزیر اعظم شہباز شریف 2 یا 3 اگست کو ہونے والی ملاقات میں قومی اسمبلی میں اپوزیشن لیڈر راجہ ریاض سے نگراں وزیر اعظم کے لیے نام پر مشاورت بھی کریں گے۔