لانگ مارچ توڑ پھوڑ کیس: بانیٔ پی ٹی آئی، شیخ رشید، فیصل جاوید بری

اسلام آباد کی ڈسٹرکٹ اینڈ سیشن کورٹ نے بانیٔ پی ٹی آئی، فیصل جاوید اور عوامی مسلم لیگ کے سربراہ شیخ رشید کو لانگ مارچ توڑ پھوڑ کیس میں بری کر دیا۔

جوڈیشل مجسٹریٹ شہزاد خان نے بانیٔ پی ٹی آئی، فیصل جاوید اور شیخ رشید کی درخواستِ بریت پر سماعت کی جس کے دوران شیخ رشید اپنے وکیل سردار عبدالرازق اور سردار شہباز کے ساتھ پیش ہوئے۔

شیخ رشید کے وکیل سردار عبدالرازق نے دلائل دیتے ہوئے کہا کہ شیخ رشید جائے وقوع پر موجود نہیں تھے، شہر سے باہر تھے، مدعی پرائیویٹ ہے، ان پر مقدمہ درج کرنے کا مجاز نہیں، شیخ رشید کے خلاف سیاسی بنیادوں پر کیس بنایا گیا۔

انہوں نے عدالت سے استدعا کی کہ اسد عمر کو بری کیا جا چکا ہے، لہٰذا شیخ رشید کی بھی درخواستِ بریت منظور کی جائے۔

عدالت نے دلائل سننے کے بعد فیصلہ محفوظ کر لیا جو کچھ دیر بعد سناتے ہوئے بانیٔ پی ٹی آئی، فیصل جاوید اور شیخ رشید کو لانگ مارچ توڑپھوڑ کیس میں بری کر دیا۔

واضح رہے کہ تھانۂ کوہسار میں بانیٔ پی ٹی آئی، شیخ رشید اور دیگر کے خلاف دفعہ 144 کی خلاف ورزی اور توڑ پھوڑ کا مقدمہ درج تھا۔