چیف آف نیول اسٹاف تیونس پہنچ گئے، سربراہ بحریہ اور وزیر دفاع سے ملاقات

چیف آف نیول اسٹاف ایڈمرل محمد امجد نیازی تیونس کے سرکاری دورے پر ہیں۔ اس دوران انہوں نے تیونس کی بحریہ کے چیف آف اسٹاف ریئر ایڈمرل عادل جہانے، وزیر برائے قومی دفاع اور نیشنل کوسٹ گارڈ سروسز کے کمانڈر سے ملاقاتیں کی ہیں۔

تیونس نیوی ہیڈکوارٹرز پہنچنے پر سربراہ پاک بحریہ کا استقبال تیونس کی بحریہ کے سربراہ نے کیا جہاں انہیں گارڈ آف آنر پیش کیا گیا۔

تیونس کی بحریہ کے سربراہ ریئر ایڈمرل عادل جہان سے ملاقات میں علاقائی میری ٹائم سیکیورٹی اور دو طرفہ بحری تعاون سمیت باہمی دلچسپی کے پیشہ وارانہ امور پر تبادلہ خیال کیا گیا۔

نیول چیف نے خطے میں میری ٹائم سیکیورٹی کو یقینی بنانے کے لیے پاک بحریہ کی کوششوں پر روشنی ڈالی جس میں ریجنل میری ٹائم سیکیورٹی پٹرولز اور کمبائنڈ میری ٹائم فورسز (CMF) میں شرکت شامل ہے۔

ایڈمرل امجد خان نیازی نے لاگولیٹ نیول بیس اور نیول اکیڈمی منزل بورگیبا کا بھی دورہ کیا۔ انہیں تیونس نیوی کے مشن اور تنظیم کے بارے میں بریفنگ دی گئی۔

ایڈمرل نے تیونس کی پٹرول بوٹ استقلال کا بھی دورہ کیا جسے تیونس کے شپ یارڈ نے مقامی طور پر بنایا تھا۔

تیونس کے وزیر دفاع سے ملاقات میں دو طرفہ دفاعی تعاون سمیت باہمی دلچسپی کے امور پر تبادلہ خیال کیا گیا۔ نیول چیف نے مشقوں اور تربیتی تبادلے کے پروگراموں کے ذریعے دونوں ممالک کی مسلح افواج کے درمیان رابطوں کو بڑھانے کی اہمیت پر زور دیا۔

وزیر دفاع نے مختلف شعبوں میں دو طرفہ فوجی تعاون کی اہمیت کو تسلیم کرتے ہوئے عسکری جہتوں میں تعاون بڑھانے پر زور دیا۔

نیول چیف کے دورہ تیونس سے دونوں ممالک اور بحری افواج کے درمیان دفاعی تعلقات کو فروغ حاصل ہوگا۔