جسٹس قاضی فائز عیسیٰ کا خط میڈیا کو کیسے لیک ہوا؟

چیف جسٹس سپریم کورٹ جسٹس عمر عطا بندیال کو اعلیٰ عدالت کے سینئر ترین جج جسٹس قاضی فائز عیسیٰ نے خط لکھ کر کئی قانونی امور پر اپنے اعتراضات سے آگاہ کیا۔

جسٹس قاضی فائز عیسیٰ نے خط میں کہا کہ سپریم کورٹ بار کی پٹیشن اور صدارتی ریفرنس کی ایک ساتھ سماعت نہیں ہو سکتی۔

انہوں نے اس جانب حوالہ دیا کہ سپریم کورٹ بار کی ہفتے کے دن درخواست کی سماعت میں صدارتی ریفرنس سننے کیلیے مقرر کرنے کا حکم دیا گیا۔

جسٹس فائز عیسیٰ نے کہا کہ جو ریفرنس دائر ہی نہیں ہوا تھا اسے سماعت کیلیے مقرر کرنے کا حکم کیسے دیا جاسکتا ہے؟

ان کا کہنا تھا کہ ایک ہی بینچ دو مختلف اختیارِ سماعت میں بیک وقت سماعت نہیں کرسکتا۔

جسٹس فائز عیسیٰ نے دوسرا اعتراض یہ اٹھایا کہ عدالتی بینچ میں سینیارٹی کے اعتبار سے چوتھے، آٹھویں اور تیرہویں نمبر کے ججز کو شامل کیا گیا۔

ان کا کہنا تھا کہ اہم آئینی معاملات میں سابق چیف جسٹس نے اس عہدے کیلیے بینچ تشکیل دینے کا صوابدیدی اختیار طے کیا ہے لیکن یہ بھی طے کیا گیا تھا کہ سینئر ججز پر مشتمل بینچ سماعت کرے گا۔

جسٹس قاضی فائز عیسیٰ نے خط میں تیسرا قانونی اعتراض یہ اٹھایا کہ ایک بیوروکریٹ کو وزیراعظم ہاؤس سے بلوا کر سپریم کورٹ کا رجسٹرار تعینات کردیا گیا ہے۔

انہوں نے کہا کہ رجسٹرار کی تقرری عدلیہ کے انتظامیہ سے الگ ہونے کے آئینی اصول کی خلاف ورزی ہے۔

After all ‘cat is out of bag’. Why this letter leaked to media? He (Justice Qazi Isa) needs to read Article 209 and code of conduct of judges, for his understanding. https://t.co/DFUMw8OwH5

— M Azhar Siddique (@AzharSiddique) March 23, 2022

ایڈووکیٹ سپریم کورٹ اظہر صدیقی نے ٹویٹ کرتے ہوئے سوال اٹھایا کہ جسٹس قاضی فائز عیسیٰ کی طرف سے چیف جسٹس سپریم کورٹ کو بھیجا گیا خط میڈیا کو کیسے لیک ہوا؟

انہوں نے کہا کہ جسٹس قاضی عیسیٰ کو آئین کا آرٹیکل 209 اور ججز کا ضابطہ اخلاق پڑھنے کی ضرورت ہے۔

ججز کوڈ آف کنڈکٹ میں درج ہے کہ ایک جج کیونکہ عوامی طور پر اپنے فرائض ادا کرتا ہے اس لیے اسے تمام پذیرائی مل جاتی ہے لیکن اسے مزید پذیرائی کیلیے کوشش نہیں کرنی چاہیے۔

اس ضابطہ اخلاق میں مزید لکھا ہے کہ ایک جج کسی عوامی تنازع میں ملوث نہیں ہوگا، سیاسی معاملے میں بھی شریک نہیں ہوگا چہ جائے کہ اس میں کوئی قانونی پہلو نا نکلتا ہو۔