وزیراعظم نے سیلاب سے متاثرہ علاقوں کے لیے امدادی فنڈ قائم کردیا

وزیراعظم شہباز شریف نے سیلاب سے متاثرہ علاقوں میں ایمرجنسی نافذ کرتے ہوئے سیلاب متاثرین کے لیے امدادی فنڈ قائم کر دیاہے۔

وزیراعظم نے ایک بیان میں کہا کہ حکومت نے مشکل معاشی حالات کے باوجود 5 ارب روپے سیلاب متاثرین کے لئے فوری جاری کر دئیے ہیں۔ عوام باالخصوص مخیر حضرات سیلاب سے متاثرہ اہل وطن کی دل کھول کر مدد کریں۔

یہ بھی پڑھیے

شاہد آفریدی فاؤنڈیشن کی بلوچستان میں امدادی سرگرمیاں جاری

اسپیکر قومی اسمبلی نے چیئرمین تحریک انصاف کی نااہلی کے لیے ریفرنس دائر کردیا

وزیراعظم نے کہا کہ سیلاب زدگان کے لئے رقوم پرائم منسٹر ریلیف فنڈ 2022 کے اکاؤنٹ نمبر جی-12164، میں جمع کرائی جاسکتی ہیں۔

انہوں نے کہا کہ سیلاب متاثرین کی ایسی مدد کریں جیسی 2005 کے زلزلے اور 2010 کے ملک کے سب سے بڑے سیلاب کے وقت  قوم نے کی تھی۔

وزیراعظم نے کہا کہ ماضی میں قوم نے متاثرین کی دل کھول کر مدد کرکے پوری دنیا میں مثال قائم کی تھی، آج بھی اسی جذبے کی ضرورت ہے۔

وزیراعظم نے کہا ہے شدید بارشوں نے سیلاب کی صورت قیامت صغری برپا کی ہے، بلوچستان میں غیر معمولی تباہی ہوئی ہے، سندھ، خیبرپختونخوا اور پنجاب میں بے تحاشہ نقصانات ہوئے ہیں۔

شہباز شریف نے کہا کہ مخیر حضرات سے اپیل ہے کہ مشکلات میں گھرے ان پاکستانیوں کو دوبارہ آباد کرنے میں حکومت کا ہاتھ بٹائیں ،سیلاب متاثرہ بھائیوں بہنوں اور بچوں کی مدد انصار مدینہ والے جذبے سے کرنے کی ضرورت ہے۔

وفاق نے سیلاب سے متاثرہ علاقوں میں ایمرجنسی نافذ کر دی ہے،صوبائی حکومتوں سے بھی گزارش کی ہے کہ متاثرہ علاقوں کو آفت زدہ قرار دیں تاکہ امدادی کاموں کو مزید تیز کیا جاسکے۔