وفاقی حکومت کا حاجیوں کو ڈیڑھ لاکھ روپے واپس کرنے کا فیصلہ

حکومت حاجیوں کو کل سے ڈیڑھ لاکھ روپے فی کس ادائیگی شروع کرے گی۔ مجموعی طور پر 5 ارب 10 کروڑ 73 لاکھ 50 ہزار روپے کی رقم سرکاری سکیم کے تحت فریضہ حج ادا کرنے والے افراد کو لوٹائی جائے گی۔

وزارت مذہبی امور نے فیصلہ کیا ہے کہ سرکاری سکیم کے تحت حج کرنے والے تمام حاجیوں کو ایک لاکھ پچاس ہزار کی رقم کی ادائی کا عمل 17 اگست کو شروع کرکے 31 اگست تک مکمل کر لیا جائے گا۔سرکاری سکیم کے تمام 34049 حاجیوں کو ادا کی جائے گی۔مجموعی طور پر 5 ارب 10 کروڑ 73 لاکھ 50 ہزار روپے کی رقم سرکاری سکیم کے تحت فریضہ حج ادا کرنے والے افراد کو لوٹائی جائے گی۔

یہ بھی پڑھیے

سوات میں پولیس کا سرچ مکمل,  سو فیصد علاقہ کلئیر قرار

ایکسپریس نیوز نے اینکر عمران ریاض خان کو آف ایئر کردیا

وزارت مذہبی امور کے حکام کے مطابق حجاج اصل شناختی دستاویزات دکھا کر رقوم اپنے متعلقہ بنکوں سے لے سکتے ہیں ،بینک اکاؤنٹس کے حامل افراد کی رقم ان کے اکاؤنٹ میں منتقل کر دی جائے گی۔

 وفاقی وزیر مذہبی امور مفتی عبدالشکور نے کہنا تھا کہ سعودی حکومت اور پاکستان کی معیشت کو بھی مشکلات کا سامنا ہے ،لازمی حج اخراجات سات ہزار ریال تک پہنچ گئے ہیں پہلے حکومت نے حج پیکج کا تخمینہ نو لاکھ انچاس ہزار لگایا تھا مگر پھر اس پر نظر ثانی کی گئی۔ان کا کہنا تھاکہ حکومت نے حاجیوں کو سبسڈی دینے کا جو وعدہ کیا تھا اس کے تحت ابتدائی طور پر ایک لاکھ پچاس ہزار کی رقم 32106 حاجیوں کودینے کا فیصلہ ہوا مگر بعد میں دو ہزار اضافی کوٹہ والے بھی اس میں شامل کرلئے گئے۔

انہوں نے بتایا کہ اسلام آباد ائیرپورٹ سے 15 ہزار سے زائد سرکاری عازمین حج کو روٹ ٹو مکہ کی سہولیات فراہم کی گئیں ۔تمام حاجیوں کے لئے ٹرانسپورٹ کی فراہمی کے علاوہ حرمین کے قریب رہائش گاہیں حاصل کی گئیں، منی میں جمرات کے قریب پاکستانیوں حاجیوں کوخیمے اور میدان عرفات میں جبل رحمت اور مسجد نمرہ کے قریب بھی خیمے فراہم کئے گئے۔ انہوں نے کہا کہ واپسی کے لیے تمام عازمین حج کو سٹی چیک ان کی سہولت دی گئی اور حاجیوں کو ان کی رہائش گاہ پر سامان وصول کرکے بورڈنگ پاس جاری کئے گئے۔

وفاقی وزیر نے بتایا کہ پہلے پاکستان کا کوٹہ 81132 عازمین حج کاتھا تاہم حکومت پاکستان کی درخواست پر سعودی حکام نے بنک متاثرین کے لیے دو ہزار کا اضافی کوٹہ دیا۔