لانگ مارچ کی کوریج کرنے والی خاتون رپورٹر صدف نعیم حادثے میں جاں بحق ہوگئیں
چینل فائیو کی رپورٹر کی ناگہانی موت پر چیئرمین تحریک انصاف عمران خان سمیت متعدد رہنماؤں نے گہرے دکھ اور افسوس کا اظہار کیا ہے۔
پاکستان تحریک انصاف کے حقیقی آزادی مارچ کے دوران انتہائی افسوسناک واقعہ پیش آیا ہے جہاں چینل فائیو کی خاتون رپورٹر کنٹینر سے گر کر جاں بحق ہو گئی ہیں، جس کے بعد چیئرمین تحریک انصاف عمران خان نے آج کے لانگ مارچ کو ختم کرنے کا اعلان کردیا ہے۔
تفصیلات کے مطابق لانگ مارچ کی کوریج کے لیے جانے والی چینل فائیو کی رپورٹ صدف نعیم دوران رپورٹنگ کنٹینر کی چھت سے گر کر جاں بحق ہو گئیں۔ صدف کو حادثے کے فوری بعد اسپتال منتقل کیا گیا تاہم وہ جاں بر نہ ہوسکیں۔
حادثے کے فوری بعد چیئرمین تحریک انصاف عمران خان نے لانگ مارچ کو کاموکے کے مقام پر ہی آج کے لیے ختم کرنے کا اعلان کردیا۔
رپورٹر صدف نعیم کی ناگہانی موت پر چیئرمین عمران خان نے اظہار تعزیت کیا ہے اور آج کے دن کے لیے لانگ مارچ کو فوری طور پر روک دیا ہے۔”
چیئرمین عمران خان کی خاتون صحافی کیساتھ حادثے پر اظہار تعزیت اور آج کے دن کے لیے لانگ مارچ کو فوری طور پر روک دیا گیا۔
#حقیقی_آزادی_لانگ_مارچ pic.twitter.com/6F5ovNM6XZ
— PTI (@PTIofficial) October 30, 2022
رہنما تحریک انصاف فواد چوہدری نے رپورٹر صدف نعیم کو خراج تحسین پیش کرتے ہوئے لکھا ہے کہ ” صدف سے زیادہ جرآت مند اور محنتی رپورٹر بہت کم دیکھے، ایک جی دار لڑکی، کل ہی عمران خان سے انٹرویو کے بعد صدف کا لاہور کی سب سے جی دار اور محنتی رپورٹر کے طور پر تعارف کروایا تو اس کی آنکھیں چمک اٹھیں کیا نہیں معلوم تھا یہ ملاقات آخری ہو گی، خدا غریق رحمت کرے۔”
صدف سے زیادہ جرآت مند اور محنتی رپورٹر بہت کم دیکھے، ایک جی دار لڑکی، کل ہی عمران خان سے انٹرویو کے بعد صدف کا لاہور کی سب سے جی دار اور محنتی رپورٹر کے طور پر تعارف کروایا تو اس کی آنکھیں چمک اٹھیں کیا معلوم تھا یہ ملاقات آخری ہو گی، خدا فریق رحمت کرے
— Ch Fawad Hussain (@fawadchaudhry) October 30, 2022
دوسری جانب وزیراعلیٰ پنجاب چوہدری پرویز الہیٰ نے چینل فائیو کی رپورٹر صدف کے جاں بحق ہونے کے واقعے پر دکھ اور افسوس کا اظہار کیا ہے۔ ان کا کہنا ہے صدف پروفیشنل ، محنتی اور قابل صحافی تھیں۔
