وزیر اعظم شہباز شریف کے داماد بغیر نمبرپلیٹ کی لگژری مرسڈیز میں سفر کرنے لگے

وزیراعظم شہباز شریف کے داماد ہارون یوسف اسلام آباد ہائی کورٹ سے حفاظتی ضمانت حاصل کرنے کے بعد بغیر نمبر پلیٹ کی مرسڈیز گاڑی میں اپنی رہائش گاہ روانہ ہوگئے ۔

نجی ٹی چینل جیو نیوز سے منسلک کورٹ رپورٹر اویس یوسفزئی نے ٹوئٹر پر ایک وڈیو شیئر کی جس میں دیکھا جاسکتا ہے وزیراعظم شہباز شریف کے داماد یوسف ہارون بغیر نمبر پلیٹ کی مرسڈیز میں عدالت سے روانہ ہو رہے ہیں۔

یہ بھی پڑھیے

آمدن سے زائد اثاثہ جات کیس: عدالت عالیہ سے وزیراعظم کے داماد کو ریلیف مل گیا

اویس یوسفزئی نے ٹوئٹر پیغام میں کہا کہ یہ وزیراعظم شہباز شریف کے داماد اور نیب ملزم یوسف ہارون ہیں جو اسلام آباد ہائی کورٹ سے حفاظتی ضمانت لینے کے بعد بغیر نمبر پلیٹ مرسڈیز میں روانہ ہورہے ہیں۔

وزیراعظم کے داماد اور نیب کے ملزم ہارون یوسف عزیز اسلام آباد ہائی کورٹ سے حفاظتی ضمانت لینے کے بعد بغیر نمبر پلیٹ کی مرسڈیز میں بیٹھ کر ہائی کورٹ کی پارکنگ سے روانہ pic.twitter.com/rZey5orzar

— Awais Yousaf Zai (@awaisReporter) December 22, 2022

اویس یوسفزئی کی شیئر کی گئی وڈیو میں دیکھا جاسکتا ہے کہ اسلام آباد ہائیکورٹ کے پارکنگ لاٹ سے بنا نمبرپلیٹ لگی پوش کار مرسڈیز میں وزیر اعظم شہباز شریف کے داماد یوسف ہارون  سوار ہورہے ہیں ۔

یاد رہے کہ گزشتہ روز وزیراعظم شہباز شریف کے داماد اور نیب کے ملزم یوسف ہارون اسلا م آباد ہائیکورٹ میں حفاظتی ضمانت کے پیش ہوئے جہاں ان کی 25 ہزار روپے کے مچلکوں کے عوض ضمانت منظور ہوئی ۔

اسلام آباد ہائیکورٹ نے ملزم ہارون یوسف عزیز کو14 روز میں متعلقہ عدالت میں پیش ہونے کا حکم  بھی دیا گیا ہے۔ عدالت نے نیب کو ملزم کے پیش ہونے تک گرفتاری سے روک دیا ہے ۔

نجی ٹی وی چینل ایکسپریس نیوز کے منسلک پروڈیوسر ثقلین شاہد لک نے اویس یوسفزئی کو مخاطب کرتے ہوئے پوچھا کہ سنا ہے کہ انہیں وزیراعظم کا پروکوٹول بھی دیا گیا تھا۔ کیا آپ اس کی تصدیق کرسکتے ہیں۔

سنا ہے وزیراعظم کا پروٹوکول بھی ساتھ تھا بغیر کسی سرکاری عہدے کے۔۔
آپ اس کی تصدیق کر سکتے پیں؟؟

— Shahid Saqlain Lak (@ShahidSaqlain) December 22, 2022

واضح رہے کہ وزیر اعظم شہباز شریف کے داماد یوسف ہارون آمدن سے زائد اثاثے کے کیس میں نیب کو مطلوب تھے اور عدالت نے انہیں مفرور قرار دے رکھا تھا تاہم اب ان کی ضمانت منظور ہوگئی ہے ۔