پنجاب کابینہ نے صوبے میں فول پروف سیکورٹی کی منظوری دے دی

پنجاب کی نئی کابینہ نے محرم الحرام خصوصاً یوم عاشور کیلئے فول پروف سیکورٹی پلان کی منظوری دے دی۔

وزیراعلیٰ پنجاب چودھری پرویز الٰہی کی زیر صدارت آج وزیراعلیٰ آفس میں صوبائی کابینہ کا پہلا اجلاس منعقد ہوا، جس میں 4 نکاتی ایجنڈے کی منظوری دی گئی۔

پنجاب کابینہ کے اجلاس میں فیصلہ کیا گیا کہ پنجا ب میں نویں اور دسویں محرم کو ڈبل سواری پر پابندی ہوگی جبکہ حساس مقامات اور جلوسوں کے راستے پر موبائل سروس بند رہے گی۔

یہ بھی پڑھیے

سید الشہدا کی قربانی تاقیامت فتح کا استعارہ ہے،نصرت بخاری

وزیراعلیٰ پنجاب چودھری پرویز الہٰی نے کہا کہ صوبائی وزراء ، مشیران اور معاونین خصوصی اپنے متعلقہ اضلاع میں سیکورٹی انتظامات کی نگرانی کریں گے۔

وزیراعلیٰ چودھری پرویز الہٰی نے صوبائی وزراء، مشیران اور معاونین خصوصی کو فی الفور اپنے اضلاع میں جا کر عوام کے جان و مال کے تحفظ کے لئے کئے جانے والے اقدامات کی مانیٹرنگ کی ہدایت کرتے ہوئے کہاکہ یوم عاشور پر قیام امن کے لئے ضلع کی سطح پر باقاعدگی سے میٹنگز کی جائیں اور تمام جلوسوں اور مجالس کی سی سی ٹی وی کوریج یقینی بنائی جائے۔

ان کا کہنا تھا محرم الحرام خصوصاً یوم عاشور پرامن فضا کو ہر قیمت پر یقینی بنایا جائے اور مذہبی ہم آہنگی کو فروغ دینے کیلئے ضلعی و ڈویژنل امن کمیٹیوں کے ارکان متحرک کردار ادا کریں۔

وزیراعلیٰ نے کہاکہ قابل اعتراض مواد کی اشاعت و تقسیم پر کوئی سمجھوتہ نہیں ہوگا، خلاف ورزی پر بلاامتیاز کارروائی کی جائے۔ ضابطہ اخلاق کی پابندی پر عملدرآمد ہر صورت یقینی بنایا جائے۔

انہوں نے کہاکہ قانون نافذ کرنے والے ادارے آپس میں قریبی رابطہ رکھیں اورسکیورٹی انتظامات کی باقاعدگی سے مانٹیرنگ کی جائے۔

وزیراعلیٰ چودھری پرویز الہٰی نے صوبے کے سیلاب متاثرہ علاقوں کیلئے خصوصی امدادی پیکیج پر تیزی سے عملدرآمد کی ہدایت کرتے ہوئے کہاکہ فصلوں اور املاک کو پہنچنے والے نقصانات کا جلد ازالہ کیاجائے گا-

پنجاب کابینہ نے کابینہ سٹینڈنگ کمیٹی برائے فنانس اینڈ ڈویلپمنٹ کی از سر نو تشکیل کی منظوری دی۔

صوبائی وزیر خزانہ محسن لغاری کمیٹی کے سربراہ ہوں گے۔ پنجاب کابینہ نے کابینہ سٹینڈنگ برائے قانونی امور کی ازسرنو کی تشکیل کی منظوری دی۔

صوبائی وزیر پبلک پراسیکیوشن و کوآپریٹو راجہ بشارت کمیٹی کے سربراہ ہوں گے۔

پنجاب کابینہ نے کابینہ کمیٹی برائے امن و امان کی ازسرِ نو تشکیل کی منظوری دی۔

کابینہ اجلاس میں بلوچستان میں پاکستان آرمی ایوی ایشن کے ہیلی کاپٹر حادثے میں شہداء کے درجات کی بلندی کیلئے دعا کی گئی۔

پنجاب کابینہ نے شہید ہونے والے کمانڈر سدرن کمانڈ لیفٹیننٹ جنرل سرفراز علی، ڈی جی پاکستان کوسٹ گارڈز میجرجنرل امجد حنیف، بریگیڈئیر محمد خالد،میجر سعیداحمد، میجر طلحہ منان اور نائیک مدثر فیاض کو خراج عقیدت پیش کیا۔

کابینہ کے اجلاس میں شہداء کے اہل خانہ سے دلی ہمدردی و تعزیت کااظہارکیاگیا-

پنجاب کابینہ نے سیلاب اور بارشوں کے باعث قیمتی انسانی جانوں کے ضیاع پر گہرے دکھ اور افسوس کا اظہارکیا۔

پنجاب کابینہ نے سیلاب میں جاں بحق افراد کے لواحقین سے دلی ہمدردی و تعزیت کا اظہارکیا۔

کابینہ اجلاس میں سیلاب و بارشوں کے باعث جاں بحق افراد کیلئے فاتحہ خوانی کی گئی۔

وزیراعلیٰ چودھری پرویز الہٰی نے کہاکہ ہیلی کاپٹر کے المناک حادثے پر ہر آنکھ اشکبار ہے اور ہم شہید فوجی افسروں کو سلام پیش کرتے ہیں۔ شہید لیفٹیننٹ جنرل سرفراز علی اور دیگرفوجی افسروں نے اپنی زندگیاں فرض کی ادائیگی پر قربان کیں۔

چودھری پرویز الہٰی نے کابینہ کے اجلاس سے خطاب کرتے ہوئے کہاکہ ہم نے صرف صوبے کے عوام کی خدمت کرنی ہے۔ آپ میری ٹیم ہیں اور ہم سب نے ٹیم بن کر عوام کو ریلیف دینا ہے۔

عوامی ویلفیئر کے ایسے کام کریں جس سے اس حکومت کا واضح فرق نظر آنا چاہیے۔ انہوں نے کہاکہ صوبے کے عوام کو ڈلیور کرنا ہے اور آپ کے کام خود بولنے چاہئیں۔