وزیراعلیٰ پرویز الٰہی کا پنجاب کی تمام کچی آبادیوں کو مالکانہ حقوق دینے کا فیصلہ

وزیراعلیٰ پنجاب چودھری پرویز الٰہی نے کہا ہے کہ ہماری حکومت نے پنجاب کی تمام کچی آبادیوں کے مکینوں کو مالکانہ حقوق دینے کا فیصلہ کیا ہے۔

وزیراعلیٰ چودھری پرویز الٰہی نے کہا کہ اس ضمن میں کچی آبادیوں کے مکینوں کو مالکانہ حقوق دینے کے فیصلے کی منظوری دے دی ہے اور مالکانہ حقوق دینے کے لئے بورڈ آف ریونیو سے حتمی سفارشات طلب کرلی ہیں۔

یہ بھی پڑھیے

حکومت ہم سے بیٹھ کربات کرے نہیں تو اسمبلیاں تحلیل کردیں گے، عمران خان

سپریم کورٹ نے سی سی پی او لاہور غلام محمود ڈوگر کو بحال کردیا

چودھری پرویز الٰہی نے ہدایت کی کہ کچی آبادیوں کو مالکانہ حقوق دینے کیلئے لیگل فریم ورک کے تحت فی الفوراقدامات کیے جائیں اور کچی آبادیوں کو مالکانہ حقوق دینے کیلئے تمام امورجلد طے کیے جائیں۔

انہوں نے کہاکہ کچی آبادیوں میں 10 مرلے تک اراضی والے مکینوں کو مالکانہ حقوق دیں گے۔ مالکانہ حقوق دینے کی سمری کابینہ کے اجلاس میں پیش کی جائے گی۔ کچی آبادیوں میں رہنے والے مکینوں کیلئے اپنی چھت کا خواب پورا کریں گے۔

وزیراعلیٰ چودھری پرویز الٰہی نے پنجاب کی کچی آبادیوں کی تفصیلات طلب کرتے ہوئے ہدایت کی کہ تمام کچی آبادیوں کی تفصیلات جلد ازجلد وزیراعلیٰ آفس بھجوائی جائیں۔ کچی آبادیوں میں مقیم اصل حقداروں کو ان کا حق لوٹائیں گے۔

پرویز الٰہی نے مزید ہدایت کی کہ کچی آبادیوں میں بنیادی سہولتوں کی فراہمی کا پلان بھی تیار کیا جائے۔

وزیراعلیٰ چودھری پرویز الٰہی کی زیر صدارت وزیراعلیٰ آفس میں اعلیٰ سطح کا اجلاس منعقد ہوا، اجلاس میں کچی آبادیوں کے مکینوں کومالکانہ حقوق دینے کیلئے سفارشات کا جائزہ لیاگیا۔ سینئر ممبر بورڈ آف ریونیو اورڈی جی کچی آبادیزپنجاب نے وزیراعلیٰ چودھری پرویز الٰہی کو بریفنگ دی۔ چیف سیکرٹری،سینئرممبر بورڈ آف ریونیو،سیکرٹری لوکل گورنمنٹ، سیکرٹری پلاننگ اینڈ ڈویلپمنٹ بورڈ،ڈی جی کچی آبادیز پنجاب اورمتعلقہ حکام نے اجلاس میں شرکت کی۔ صوبائی مشیر سردار ایاز خان نیازی، کمشنر ملتان ڈویژن او رڈپٹی کمشنر خانیوال نے ویڈیولنک کے ذریعے اجلاس میں شرکت کی۔