سابق وزیراعظم عمران خان کا اتوار دو بجے میناز پاکستان پر جلسے کا اعلان

سابق وزیراعظم و پاکستان تحریک انصاف کے چیئرمین عمران خان نے کہا ہے کہ توشہ خانہ کیس میں دودھ کا دودھ پانی کا پانی ہوگیا، توشہ خانہ گھڑی کے معاملے پر مجھ پربےحد تنقید کی گئی اور کیس بنایاگیا، ہر طرح سے میری کردار کشی کی گئی لیکن ن لیگ کی فنڈنگ سامنے آئی تو سب پتا لگ جائے گا۔

ان خیالات کا اظہار انہوں نے داتا دربار کے باہر پاکستان تحریک انصاف کی ریلی سے خطاب کرتے ہوئے کیا۔ ان کا کہنا تھا کہ اتوار کو دن 2 بجے مینار پاکستان پر جلسہ کروں گا، ہمیں مل کر جدوجہد کرنی ہے۔

یہ بھی پڑھیے

عمران خان کو عدالت بلائے تو ٹانگ ٹوٹی کے بہانے جلسے کے لیے تیار، مریم نواز

سابق وزیراعظم عمران خان کا کہنا تھا کہ سب کو پتا ہے میری جان کو خطرہ ہے، ملک کے اوپر چوروں کا ٹولہ مسلط ہے، ان چوروں کے احتساب اور حقیقی آزادی کیلئے قوم کو نکلنا ہوگا۔

عمران خان نے کہا کہ کامیاب تاریخی ریلی پر مرکزی اور صوبائی قائدین کو مبارکباد دیتا ہوں۔ ریلی سے خطاب کے بعد چیئرمین پی ٹی آئی عمران خان واپس زمان پارک روانہ ہوگئے۔

اس سے قبل چیئرمین پاکستان تحریک انصاف عمران خان کی قیادت میں پی ٹی آئی کی انتخابی ریلی زمان پارک سے داتا دربار پہنچی۔

تحریک انصاف کی انتخابی ریلی آغاز میں زمان پارک سے گڑھی شاہو پہنچی، ریلی میں پی ٹی آئی کے رہنماؤں اور کارکنوں کی کثیر تعداد شریک ہوئی، گڑھی شاہو پہنچنے پر ریلی کا تحریک انصاف کے کارکنوں کی جانب سے شاندار استقبال کیا گیا۔

گڑھی شاہو چوک پر کارکنوں کی جانب سے قیادت کے حق میں نعرے بازی بھی کی گئی، ریلی کے دوران اپنی گاڑی میں موجود سابق وزیر اعظم عمران خان ہاتھ ہلا کر کارکنوں کے نعروں کا جواب بھی دیتے رہے، ریلی کا دو موریہ پل پہنچنے پر آتش بازی سے استقبال کیا گیا۔

دو موریہ پل سے پی ٹی آئی کی ریلی داتا دربار پہنچی تو وہاں پر پہلے سے بڑی تعداد میں موجود تحریک انصاف کے کارکنوں نے استقبال کیا، ریلی کے استقبال کیلئے داتا دربار کے باہر کنٹینر لگا کر خصوصی سٹیج بھی سجایا گیا تھا، ریلی ختم ہونے کے بعد عمران خان واپس روانہ ہو گئے۔

ریلی کی دوران میڈیا سے گفتگو کرتے ہوئے ڈاکٹر یاسمین راشد کا کہنا تھا کہ تمام رکاوٹوں کے باوجود لاہور کی عوام جگہ جگہ عمران خان کا تاریخی استقبال کر رہی ہے، وہ عوام کے دلوں پر حکمرانی کرتے ہیں، زندہ دلانے لاہور نے تاریخی استقبال کر کے یہ ثابت کر دیا کہ وہ عمران خان کے ساتھ کھڑے ہیں۔

ڈاکٹر یاسمین راشد نے کہا کہ ریلی میں عوام کا ٹھاٹھیں مارتا سمندر دیکھ کر حکمرانوں کے ہوش اڑ چکے ہیں، توشہ خانہ چوروں کو عوام کا سمندر بہا کر لے جائے گا، مریم نواز اور ان کے حواریوں کی منفی سیاست ہمیشہ کیلئے دفن ہو چکی ہے، ان کی فضول گفتگو پر عوام دھیان نہیں دیتے۔