سیاستدانوں کا فرض ہے کہ وہ عوام کو طاقتور بنائیں، سید خورشید شاہ

سکھر: پاکستان پیپلزپارٹی کے مرکزی رہنما اور وفاقی وزیر سید خورشید احمد شاہ نے کہا ہے کہ آج جمہوریت کو خطرہ ہے، اداروں کے ٹکراؤ سے ملک اور عوام کمزور ہو رہے ہیں، سیاستدان کا کام ووٹ لینا یا گالم گلوچ کرنا نہیں ہے۔ شہید ذوالفقار علی بھٹو نے عوام کو پرچی سے مستقبل بدلنے کا حق دیا ہے۔

ان خیالات کا اظہار انہوں نے سکھر میں ڈسٹرکٹ کونسل ہال کی عمارت کی افتتاحی تقریب سے خطاب کرتے ہوئے کیا۔ افتتاحی تقریب میں ایڈمنسٹریٹر ڈسڑکٹ کونسل سکھر اعجاز احمد پلھ ، ڈپٹی کمشنر سکھر شہزاد طاہر تھہیم ، افسران سید اکبر علی شاہ ، یونین رہنما عبدالمجید جسکانی ، پی پی سٹی سکھر کے صدر مشتاق سرھیو، سابق ضلع ناظم سردار تقی خان دھاریجو ، سید قاسم علی شاہ ، ڈپٹی مئیر طارق چوہان سمیت دیگر معززین نے شرکت کی۔

یہ بھی پڑھیے 

مفتاح اسماعیل کو ہر ڈویژن کو صوبہ بنانے کی تجویز پر تنقید کا سامنا

پنجاب اور کےپی میں انتخابات وقت پر نہ ہوئے تو عوامی انقلاب آئے گا، فواد چوہدری

سید خورشید احمد شاہ نے مزید کہا کہ جلد وفاقی کابینہ میں تجویز پیش کروں گا کہ ملک میں سرکاری ملازمین کی تنخواہ میں 30 سے 35 فیصد اضافہ کیا جائے اور مزدور کی تنخواہ کم سے کم 35 ہزار مقرر کی جائے۔

سید خورشید شاہ کا  کہنا تھا کہ مہنگائی کا مقابلہ کرنے کے لیے ہمیں تنخواہیں بڑھانا ہونگی اور موجودہ حالات میں تو یہ اور ضروری ہوگیا ہے۔

ان کا کہنا تھا کہ شہید ذوالفقار علی بھٹو نے عوام کو پرچی سے مستقبل بدلنے کا حق دیا ، اس دور میں کوڑے جیلوں اور پھانسیوں نے جس جمہوریت کو جنم دیا آج اس جمہوریت کو خطرہ ہے، اداروں کے ٹکراؤ سے ملک اور عوام کمزور ہو رہے ہیں، اس پر سیاسی قوتوں کو سوچنا ہوگا اگر ہم نے پارلیمنٹ کو طاقتور نہ بنایا تو عوام کبھی طاقتور نہیں بن سکیں گے اور ملک کے4 فیصد سرمایہ کار 96 فیصد عوام پر حکومت کرنے لگیں گے۔

سید خورشید کا کہنا تھا کہ سیاستدانوں کا فرض ہے کہ وہ عوام کو طاقتور بنائیں اور ان کا پیٹ بھریں ان کے مسائل حل کریں ان کا کہنا تھا کہ تعلیم کا راستہ ترقی کا راستہ ہے اور جہالت کا راستہ تباہی کی طرف لے جاتا ہے، آج ہم سے ایم اے پاس لوگ بھی نوکریاں مانگنے آرہےہیں، ہم نے قوم کو چوکیدار یا پٹیوالہ نہیں بنانا ہے۔

انہوں نے کہا کہ ملک میں مہنگائی کی وجہ سے لوگوں کی زندگی اجیرن ہوگئی ہے، ملک کا مزدور سب سے زیادہ مہنگائی سے متاثر ہے، ہم نے اپنے دور میں مہنگائی کا بھرپور مقابلہ کیا، ملازمین کی تنخواہیں بڑھائیں۔

خورشید شاہ کا کہنا تھا کہ ہماری ذمہ داری صرف ووٹ لینا یا گالم گلوچ کرنا نہیں ہے، ہمارا کام ملک اور علاقے کی تعمیر و ترقی ہے۔

ان کا کہنا تھا کہ لوگ چاہتے ہیں کہ انہیں ایسا روزگار ملے جس میں انہیں کچھ کرنا نہ پڑے مگر میں آج کھل کرکہتا ہوں کہ ایسا نہیں ہوگا اب کام کریں گے تو تنخواہ ملے گی۔

وفاقی وزیر کا مزید کہنا تھا کہ ہم نے جو عوام کو دیا ہے وہ ہماری پارٹی بھٹو شہید اور بینظیر شہید کا عطا کردہ ہے، میں اندر سے بھی صاف ہوں اور باہر سے بھی صاف ہوں۔

ان کا کہنا تھاکہ سکھر سندھ کا تاریخی شہر اور ضلع ہےاور اس کا شمار سندھ کے ان اضلاع میں ہوتا ہے جہاں پر تمام سہولیات موجود ہیں ہم نے سکھر میں متعدد اسپتال بنوائے ہیں یہاں کے لوگوں کو لیور ٹرانسپلانٹ کے لیے بھارت جانا پڑتا ہے اب سندھ میں مفت علاج ہورہاہے پیپلزپارٹی کی حکومت نے سکھر میں 5 سے 6 یونیورسٹیاں قائم کی ہیں جبکہ سکھر میں کامسیٹ یونیورسٹی بنارہے ہیں۔