آئی پی پی نے تنظیم سازی کےلیے علاقائی کمیٹیوں کا اعلان کر دیا

نوٹیفکیشن سرپرست اعلیٰ جہانگیر ترین اور پارٹی صدر عبدالعلیم خان کی مشاورت سے جاری کیا گیا ہے۔

شبیرحسین خان20 جون 2023

حال ہی میں قائم ہونے والی سیاسی جماعت، استحکام پاکستان پارٹی (آئی پی پی) نے آئندہ عام انتخابات کے لیے اپنی جامع تنظیمی حکمت عملی کے تحت اپنی جماعت کی تنظمیں کمیٹیاں تشکیل دے دی ہیں۔

سیکرٹری جنرل عامر محمود کیانی نے باضابطہ اعلان کرتے ہوئے بتایا ہے کہ "ضلعی انتظامیہ کو حتمی شکل دینے تک اپنے متعلقہ ڈویژنوں اور اضلاع میں پارٹی امور کی نگرانی کے لیے علاقائی کمیٹیاں تشکیل دی جائیں گی۔”

یہ بھی پڑھیے

علیم خان کی عون چوہدری اور نعمان لنگڑیال کو وفاقی کابینہ چھوڑنے کی ہدایت

حافظ نعیم الرحمان نے کراچی میئر کے انتخاب میں ای سی پی پر پیپلز پارٹی کی مدد کا الزام لگا دیا

سیکریٹری جنرل آئی پی پی کا کہنا ہے کہ "ان علاقائی کمیٹیوں کو اپنے ڈویژنوں میں ضلعی باڈی کے لیے موزوں امیدواروں کی سفارش کرنے کا کام سونپا گیا ہے، یہ عمل اگلے 10 دنوں میں مکمل کیا جائے گا۔”

ان کا کہنا ہے کہ "ان کمیٹیوں کے قیام کا فیصلہ سرپرست اعلیٰ جہانگیر ترین اور پارٹی صدر عبدالعلیم خان کے ساتھ دیگر پارٹی رہنماؤں نے مشاورت سے کیا ہے۔ ان کمیٹیوں کی تشکیل کا مقصد پارٹی کے تنظیمی ڈھانچے کو مضبوط بنانا ہے۔