ای اسپورٹس پاکستان کے باقاعدہ کھیلوں میں شامل
پاکستان اسپورٹس بورڈ اور پاکستان سائنس فاؤنڈیشن کے درمیان یادادشت طے پا گئی ہے۔
پاکستان میں ای اسپورٹس کے شوقین افراد کے لیے خوشخبری آگئی ہے کہ اب یہ تمام کھیلوں کا باقاعدہ حصہ ہوں گے۔
سماجی رابطوں کی ویب سائٹ ٹوئٹر پر جاری پیغام میں وفاقی وزیر برائے سائنس و ٹیکنالوجی فواد چوہدری نے بتایا کہ پاکستان اسپورٹس بورڈ اور پاکستان سائنس فاؤنڈیشن کے درمیان یادادشت طے پا گئی ہے جس کے بعد ای اسپورٹس کو باقاعدہ کھیل کا درجہ حاصل ہوگا۔
پاکستان سپورٹس بورڈ اور پاکستان سائنس فاونڈیشن کے درمیان یادادشت طے پا گئ ہے جس کے بعد E-Sports کو باقاعدہ کھیل کا درجہ حاصل ہو گا، اگر آپ کو ویڈیو گیمز سے دلچسپی ہے تو تیار ہو جائیے اور نئے مواقع آپ کے منتظر ہیں۔
— Ch Fawad Hussain (@fawadchaudhry) January 13, 2021
اپنی ٹوئٹ میں فواد چوہدری نے کہا کہ یادداشت ویڈیو گیمز سے دلچسپی ہے توتیار ہوجائیں، نئے مواقع آپ کے منتظر ہیں۔
گزشتہ برس دسمبر میں وفاقی وزیر برائے سائنس و ٹیکنالوجی فواد چوہدری نے معروف ٹی وی میزبان وقار ذکا سے ملاقات میں اسلام آباد میں مارچ 2021 میں قومی سطح کے ای کھیلوں کے مقابلے منعقد کرانے کا اعلان کیا تھا۔
Salute to @fawadchaudhry for announcing this https://t.co/KCLjuMjNyC
— Waqar Zaka (@ZakaWaqar) December 3, 2020
اس سے قبل نومبر 2020 میں وزارتِ سائنس و ٹیکنالوجی نے پاکستان میں ویڈیو گیمز پروگرامنگ کا ایک خصوصی پروگرام لانے کا اعلان کیا تھا۔ فواد چوہدری نے کہا تھا کہ ماضی میں پاکستان میں سرکاری سطح پر ویڈیو گیمنگ انڈسٹری کو توجہ نہیں دی گئی۔ اب پی ٹی آئی حکومت نے ویڈیو گیمز کی صنعت کو فروغ دینے کی تیاری کرلی ہے۔
انہوں نے کہا تھا کہ ویڈیو گیمز کے اس خصوصی پروگرام کا مقصد یہ ہے کہ ہم 90 ارب ڈالرز کی انڈسٹری کا حصہ بن سکیں۔
اگر آپ کو پڑھنے سےدلچسپی نہیں اور فون پر ویڈیو گیمز سےرغبت ہے تو تیاری رکھیں @MinistryofST ویڈیو گیمز پروگرامنگ کا خصوصی پروگرام لارہی ہے تا کہ ہم 90 ارب ڈالر کی اس انڈسٹری کاحصہ بن سکیں، Animation اور ویڈیو گیمز سرٹیفیکیشن پروگرام نوجوانوں کیلئے Game ہی نہیں Game Changer ہوں گے
— Ch Fawad Hussain (@fawadchaudhry) November 24, 2020
فواد چوہدری نے مزید کہا تھا کہ اینی میشن اور ویڈیو گیمز سرٹیفکیشن پروگرامز نوجوانوں کے لیے گیم ہی نہیں بلکہ گیم چینجر بھی ہوں گے۔
دنیا بھر میں گیمنگ انڈسٹری میں مستقل نمو کے باوجود ویڈیو گیمز تیار کرنے اور ڈویلپرز کو مواقع فراہم کرنے کے معاملے میں پاکستان کافی پیچھے ہے۔
یہ بھی پڑھیے
ویڈیو گیمنگ اور اینی میشن کے شوقین افراد کے لیے خوشخبری
ای اسپورٹس کو پاکستان میں کے باقاعدہ کھیلوں میں شامل کرنے کا اقدام اس وقت سامنے آیا ہے جب گزشتہ سال مارچ میں ڈیجیٹل ویڈیو گیمز پر اخراجات ریکارڈ 10.10 بلین ڈالرز پر آگئے تھے کیونکہ عوام نے کرونا وائرس کے باعث لگنے والے لاک ڈاؤن کے دوران گھروں میں زیادہ تر وقت گیمنگ پر صرف کیا تھا۔
