پاکستان کرکٹ میں جنوبی افریقہ سے ہار گیا انڈیا سے جیت گیا

ایک جانب جنوبی افریقہ کی کرکٹ ٹیم نے پاکستان کو دوسرے ون ڈے میں 17 رنز سے شکست دے دی ہے تو دوسری جانب پاکستان کی بلائنڈ کرکٹ ٹیم نے روایتی حریف انڈیا کو سہہ ملکی ٹی ٹوئنٹی بلائنڈ کرکٹ ٹورنامنٹ کے فائنل میں 62 رنز سے شکست دے کر ٹائٹل اپنے نام کرلیا ہے۔

جنوبی افریقہ کے شہر جوہانسبرگ میں کھیلے جانے والے دوسرے ون ڈے انٹرنیشنل میں جنوبی افریقہ نے پہلے بیٹنگ کرتے ہوئے پاکستان کو 342 رنز کا ہدف دیا تھا۔ جواب میں پاکستان نے مقررہ 50 اوورز میں 9 وکٹوں کے نقصان پر 324 رنز اسکور کیے تھے۔

پاکستانی اننگز میں سب سے عمدہ  کھیل کا مظاہرہ فخر زمان نے شاندار بلے بازی کر کے پیش کیا۔ فخر زمان نے جنوبی افریقہ کے باؤلرز کا جم کر مقابلہ کیا اور 155 گیندوں پر 193 کی شاندار اننگز کھیلی۔ فخر زمان کی اننگز میں 18 چوکے اور 10 چھکے شامل تھے۔

جنوبی افریقہ کی جانب سے آنرِچ نورجے نے 3، پھیلو کوایو نے 2 جبکہ ربادا نگیدی اور تبریز شمسی نے ایک ایک کھلاڑی کو آؤٹ کیا تھا۔

پاکستان کی جانب سے حارث رؤف نے 3 جبکہ شاہین آفریدی، محمد حسنین اور فہیم اشرف نے ایک ایک کھلاڑی کو پویلین کی راہ دکھائی تھی۔ جبکہ شاداب خان کے حصے میں کوئی وکٹ نہیں آئی۔

یہ بھی پڑھیے

ون ڈے کرکٹ میں سبقت پاکستان یا جنوبی افریقہ کی؟

پاکستان اور جنوبی افریقہ کے درمیان دوسرا میچ سوشل میڈیا پر شائقین کی توجہ کا مرکز بنا ہوا ہے۔ جہاں دونوں ٹیموں پر تبصرے کیے جارہے ہیں وہیں دوسری اننگز کے آغاز سے لے کر اختتام تک فخر زمان موضوع بحث بنے رہے۔

جنوبی افریقہ کے وکٹ کیپر کونٹین ڈی کوک کے اشارے پر فخر زمان کے رن آؤٹ ہونے پر تبصرہ کرتے ہوئے ٹوئٹر کی ایک صارف پریا شرما نے اپنے ٹوئٹ میں کہا ہے کہ ’کونٹین ڈی کوک کی حرکت کچھ اگلی سطح کی تھی۔ ان کے اندر کہیں چھوٹا کمار سنگاکارا چھپا ہوا ہے۔‘

That was some next level stuff from Quinton de kock. Almost saw a mini Kumar Sangakkara inside him#SAvPAK #fakharzaman #deock pic.twitter.com/xTSzmow05o

— priya sharma (@iplteamtrolls) April 4, 2021

انٹرنیشنل کرکٹ کونسل (آئی سی سی) نے فخر زمان کی کارکردگی کو سراہتے ہوئے ٹوئٹ کیا ہے۔

🏏 193 runs
⚪ 155 balls
🔥 18 fours and 10 sixes

What an exceptional knock from @FakharZamanLive 🙌

It is also the highest individual score at the Wanderers!#SAvPAK | https://t.co/xcauK7pG9h pic.twitter.com/L5jcrcSIDf

— ICC (@ICC) April 4, 2021

دوسری جانب پاکستان کی بلائنڈ کرکٹ ٹیم سہہ ملکی ٹی ٹوینٹی بلائنڈ کرکٹ ٹورنامنٹ کا چیمپیئن بن گیا ہے۔ ٹورنامنٹ کے فائنل میچ میں پاکستان نے روایتی حریف انڈیا کو 62 رنز سے شکست دی ہے۔

سہہ ملکی ٹی ٹوینٹی بلائنڈ کرکٹ ٹورنامنٹ میں انڈیا نے ٹاس جیت کر فیلڈنگ کا فیصلہ کیا اور پاکستان کو بیٹنگ کی دعوت دی۔ پاکستان نے مقررہ 15 اوورز میں 3 وکٹوں کے نقصان پر 174 رنز اسکور کیے اور انڈیا کو جیت کے لیے 175 رنز کا ہدف دیا۔

پاکستان کی جانب سے کپتان نثار علی نے ناقابل شکست اننگز کھیلتے ہوئے 69 رنز بنائے جبکہ ظفر اقبال نے 24 گیندوں پر شاندار 48 رنز اسکور کیے۔ انڈیا کی جانب سے اجے کمار نے 2 کھلاڑیوں کو آؤٹ کیا۔

ہدف کے تعاقب میں انڈیا کی بلائنڈ کرکٹ ٹیم مقررہ 15 اوورز میں 7 وکٹوں کے نقصان پر 112 رنز بنا پائی تھی۔ پاکستان کی جانب سے ساجد نواز نے 2 اور کپتان نثار علی نے ایک کھلاڑی کو آؤٹ کیا۔

بنگلہ دیش میں ہونے والے بلائنڈ کرکٹ ٹورنامنٹ میں میزبان بنگلا دیش، پاکستان اور انڈیا کی ٹیموں نے شرکت کی تھی۔ سیمی فائنل میں پاکستان بلائنڈ کرکٹ ٹیم نے بنگلا دیش بلائنڈ کرکٹ ٹیم کو شکست دی تھی۔