کامران اکمل نے پی ایس ایل 7 سے دستبرداری کا فیصلہ کیوں واپس لیا؟

ٹیسٹ کرکٹر کامران اکمل  نے پاکستان سپر لیگ (پی ایس ایل ) کے ساتویں ایڈیشن سے دستبرداری کا فیصلہ واپس لے لیا۔کامران اکمل سلور کیٹیگری میں رہتے ہوئے پشاور زلمی کی  نمائندگی  کریں گے۔

کامران اکمل  نے پشاور زلمی کےکوچ اور ڈائریکٹر کرکٹ محمد اکرم  سے ملاقات  کے بعد  پی ایس ایل سے دستبردار ہونے کا فیصلہ واپس لیا۔محمد اکرم کا کہنا ہے کہ کامران اکمل ہمیشہ ہمارے اہم کھلاڑی رہے ہیں ، وہ  پی ایس ایل  کے ساتویں ایڈیشن میں پشاور زلمی کا حصہ ہوں گے ۔

یہ بھی پڑھیے

پی ایس ایل 7 طےشدہ تاریخ سے ملتوی ہونے کا امکان

پی ایس ایل سیزن سیون، اہم کھلاڑیوں کی ڈرافٹنگ

کامران اکمل نے پی ایس ایل  کے ساتویں ایڈیشن کی ڈرافٹنگ کے دوران سلور کیٹیگری میں منتخب کیے جانے پر احتجاجاًپی ایس ایل سے دستبرداری کا اعلان کردیا تھا۔پی ایس ایل کے ڈرافٹ رولز کے مطابق اگر کسی کھلاڑی کو ان کی نامزد کیٹیگری میں منتخب نہیں کیا  جاتا تو اس سے نچلی کیٹیگری میں منتخب کرنے کیلیے کھلاڑی سے رضامندی لینا پڑتی ہے تاہم کھلاڑی اکثر ڈیموشن کی حد مقرر کرتے ہیں۔

کامران اکمل کے بارے میں کہا جاتا ہے کہ مبینہ طور پر وہ کبھی بھی گولڈ سے کم پراپنا انتخاب نہیں چاہتے تھے ۔تاہم پشاور  زلمی نے انہیں  بہرحال سلور کیٹیگری میں منتخب کیا لیکن انہیں مینٹور کا درجہ دیکر ان کے معاوضے میں اضافہ کردیا ہے

زلمی کے ہیڈ کوچ محمد اکرم نےکرک انفو کو بتایا کہ ہم کامران کا بہت احترام کرتے ہیں،ان کا سلور کیٹیگری میں انتخاب  ہماری حکمت عملی کا ایک حصہ تھا کیونکہ ڈرافٹ یہ بتاتا ہے کہ آپ کس  کھلاڑی کو کس مرحلے پرمنتخب کرنا ہے ۔انہوں نے کہا کہ ہمارے پاس رائٹ ٹو میچ کارڈ تھا اورہم نے اس کارڈ کو کامران اکمل کیلیے بچا کرکیونکہ ہمیں پتہ تھا کہ کوئی ٹیم اسے منتخب کرسکتی ہے ۔انہوں نے کہاکہ  جب ایک کھلاڑی کو بچاکر رکھنے کا کوئی  طریقہ ہو موجود ہو تو اس بات کو یقینی بنانا ہوتا ہے کہ مالی طور پر اسے نقصان نہ پہنچے۔

محمد اکرم نے مزید کہا کہ ہم کامران کے جذبات کا احترام کرتے ہیں لیکن ایک بار جب میں نے انہیں سمجھایا تو وہ سمجھ گئے، ہم نے انہیں سلور کیٹیگری میں منتخب کیا لیکن ساتھ ہی ہم نے انہیں مینٹور کے طور پر بھی نامزد کیا۔ وہ ایک بہت ہی سینئر کرکٹر ہیں اور بطور کوچ مجھے ان سے حوصلہ ملتا ہے۔

واضح رہے کہ کامران اکمل کا پی ایس ایل ریکارڈ خاص اہمیت کا حامل ہے۔انہوں نے پی ایس ایل کے  69 میچوں میں136.84 کے اسٹرائیک ریٹ کے ساتھ  1820 رنز بنارکھے ہیں  ۔58میچز میں 2070رنز بنانے والے بابراعظم  کےبعد کامران پی ایس ایل کے دوسرے کامیاب ترین بلےباز ہیں ۔کامران اکمل کو پی ایس ایل میں  تین سنچریاں  اسکور کرنےو الے واحد بلے باز ہونےکا اعزاز بھی حاصل ہے۔یار رہے کامران اکمل پی ایس ایل میں 60 آؤٹ کے ساتھ سرفہرست وکٹ کیپر بھی ہیں۔