راجیو شکلا نے عمران خان کے سیاسی ٹوئٹ کو میچ فکسنگ سے جوڑدیا
بھارتی کرکٹ بورڈ کے نائب صدر وزیراعظم کے سیاسی میچ فکسنگ کے بیان کو کرکٹ سے جوڑ بیٹھے اور آئی سی سی کے نام شکایتی ٹوئٹ کردیا، سوشل میڈیا پر تنقید کے بعد پینترا بدل لیا
بھارتی کرکٹ کنٹرول بورڈ (بی سی سی آئی) کے نائب صدر راجیو شکلا وزیراعظم عمران خان کی سیاسی ٹوئٹ کا کچھ اور مطلب سمجھ بیٹھے اور آئی سی سی کو چغلی لگادی بعدازاں سوشل میڈیا پر تنقید کے بعد پینترا بدلا اور جھینپ مٹانے کیلیے اپنے ٹوئٹ کو مذاق قرار دیدیا۔
وزیراعظم عمران خان نے گزشتہ روز اپنے ٹوئٹ میں کپتان بابر اعظم کراچی ٹیسٹ ڈرا کرنے پر مبارکباد دی تھی اور ساتھ ہی سیاسی صورتحال پر تبصرہ کرتے ہوئے سیاسی میچ فکسنگ کا تذکرہ کیا تھا جسے راجیو شکلا کرکٹ کی میچ فکسنگ سمجھ بیٹھے اور آئی سی سی سے تحقیقات کا مطالبہ بھی کردیا۔
یہ بھی پڑھیے
بابر اعظم واقعی کرکٹرِ اعظم ہیں، وزیراعظم سمیت سب نے مان لیا
عبداللہ شفیق بلے بازی کے ساتھ سُروں کے بھی پکے نکلے
وزیراعظم عمران خان نے کراچی ٹیسٹ میں شاندار کارکردگی پر بابراعظم کو بطور کپتان شاندار اننگز اور ورلڈ کلاس بیٹنگ پر مبارکباد پیش کی تھی۔
Congratulations to Babar Azam for leading the Pak team in a tremendous fightback with a superb captain’s inning & world class batting display; & congratulations to the rest of the team too in the way they fought back, especially Rizwan & Shafique.
— Imran Khan (@ImranKhanPTI) March 17, 2022
وزیراعظم نے لکھا تھا کہ زبردست فائٹ بیک کرنے پر باقی ٹیم کو بھی مبارکباد، پوری ٹیم بالخصوص رضوان اور شفیق نے بھی زبردست مقابلہ کیا۔
وزیراعظم نے مزید لکھا تھا کہ بدقسمتی سے کراچی کا میچ دیکھ نہیں سکا کیونکہ میں میچ فکسنگ کیخلاف ایک اور محاذ پر لڑ رہا ہوں جہاں میرے کھلاڑیوں کو بھاری رقم کے ذریعے لالچ دی جارہی ہے۔
راجیو شکلا نے وزیراعظم عمران خان کا ٹوئٹ شیئر کرتے ہوئے لکھا کہ آئی سی سی اینٹی کرپشن یونٹ کو وزیراعظم اور لیجنڈ کرکٹر کے بیان پر نوٹس لینا چاہیے۔
I was also being sarcastic on @ImranKhanPTI tweet of political match fixing on the eve of Holi which is known for humour and colours. Bura na mano holi hai
— Rajeev Shukla (@ShuklaRajiv) March 18, 2022
بعدازاں راجیو شکلا نے سوشل میڈیا پر ہونے والی تنقید کے بعد ایک اور ٹوئٹ کرتے ہوئے پینترا بدلا کہ مزاح اور رنگوں کے حوالے سے مشہور ہولی کے تہوار کے موقع پرعمران خان کے سیاسی میچ فکسنگ کے ٹوئٹ پر مجھے طنز کانشانہ بنایا جارہا تھا، برا نہ مانو، ہولی ہے۔
