جامعہ این ای ڈی میں دو روزہ ماحولیاتی کانفرنس کا انعقاد، آٹھ کی نوٹ اسپیکرز نے خطاب کیا

ٹیکنالوجی کی مدد سے ماحولیاتی تناؤ کم کیا جاسکے گا، ماحولیاتی تبدیلیوں کا مقابلہ تعلیمی سطح پر شعور و آگہی کی فراہمی سے کیا جاۓ، ماحول کی بہتری میں این ای ڈی دوسری جامعات کے لیے مثال ہے، ان خیالات کا اظہار جامعہ این ای ڈی میں منعقدہ CLIMATECH 2025 کانفرنس میں
قونصل جزل ترکیہ جمال سانگو نے کیا۔ اس موقعے پر خطاب کرتے ہوۓ ان کا کہنا تھا کہ تحقیق صرف تحقیقی مقالہ جات کو پڑھنے تک محدود نہ ہو بلکہ معاشرتی مسائل کے حل اور اطلاق کے لیے ہو۔ ان کا مزید کہنا تھاکہ ٹیکنالوجی کی مدد سے ماحولیاتی تناؤ کم کیا جاسکے گا۔ انہوں نے تعلیمی اداروں پر زُور دیا کہ ماحولیاتی تبدیلیوں کا مقابلہ تعلیمی سطح پر شعور و آگہی فراہم کرکے کیا جاۓ۔ ان کا مزید کہنا تھا کہ ماحول کی بہتری میں این ای ڈی دوسری جامعات کے لیے مثال ہے۔ کانفرنس چیئر ڈاکٹر عمران اسلم، کو چیئر ڈاکٹر عرفان احمد، ڈاکٹر غوث بخش ناریجو، سیکریٹری حرا مریم سمیت ماہرین نے طالب علموں کو ٹیکنالوجی کے مثبت استعمال کے طریقے سکھاۓ۔ اس موقعے پر پرووائس چانسلر ڈاکٹر طفیل کا کہنا تھاکہ ماحولیاتی تناؤ کی تخفیف کے لیے تمام اسٹیک ہولڈرز کو مل کر کام کرنا ہوگا، کانفرنس ہر فرد کے لیے شعور و آگہی کا دروازہ ہے۔ انہوں نے کہاکہ پاکستان، بھارت اور بنگلہ دیش میں دو تہائی اموات فضائی آلودگی کی وجہ سے ہوجاتی ہیں جوکہ تشویش ناک ہے۔ انہوں نے طالب علموں پر زور دیا کہ ٹیکنالوجی کا مثبت استعمال کرکے ماحول کو بہتر کرنا آپ کے ذمّے ہے۔ کانفرنس کے اختتام پر پرووائس چانسلر ڈاکٹر محمد طفیل، کو پیٹرن ڈاکٹر نعمان احمد، رجسٹرار سید غضنفر حسین، سابقہ چیئرمین پی پی ایل عاصم مرتضی، ڈائریکٹر ٹیکنالوجیز ہارون بنگال اورچیئر ڈاکٹر عمران اسلم نے کانفرنس کی ٹیم اور شرکاء میں شیلڈز و سرٹیفیکٹس تقسیم کیے۔