این ای ڈی کو جب ضرورت ہو، میں موجود ہوں، ڈاکٹر سروش لودھی

جامعہ این ای ڈی کے تحت شیخ الجامعہ ڈاکٹر سروش حشمت لودھی کی بحیثیت وائس چانسلر ریٹائرمنٹ پر الوداعی تقریب کا انعقاد کیا گیا۔ جس سے قایم مقام وائس چانسلر پروفیسر ڈاکٹر نعمان احمد، پروائس چانسلر پروفیسر ڈاکٹر محمد طفیل نے خطاب کیا۔ اس موقعے پر خطاب کرتے ہوۓ شیخ الجامعہ این ای ڈی ڈاکٹر سروش لودھی کا کہنا تھا کہ میں نے اپنی مادرِ علمی کو زندگی کے 37 برس دئیے اور آج بھی اس کا مقروض ہوں۔ این ای ڈی میرا فخر میری پہچان ہے، میں نے ہر کام جامعہ کی بہتری کے لیے کیا۔ ان کا کہنا تھا کہ آئندہ بھی اپنی جامعہ کے لیے ہر خدمت انجام دینے کے لیے حاضر ہوں۔ جہاں میری ضرورت ہو، میں موجود ہوں۔ اس موقعے پر انہوں نے آبدیدہ ہوتے ہوۓ جامعہ کی ٹیم، ساتھی اساتذہ اور اپنے گھرانے کا شکریہ ادا کیا۔ جامعہ کی ترجمان فروا حسن کے مطابق ڈاکٹر سروش لودھی نے این ای ڈی سے سول انجینئرنگ کی ڈگری میں حاصل کی جب کہ سینتس برس این ای ڈی کے مختلف شعبہ جات سے وابستہ رہے۔ سول انجینئرنگ سے متعلق ڈاکٹر سروش لودھی کی متعدد پبلی کیشنز ہیں اور وہ کتاب "زلزلہ” کے مصنف بھی ہیں۔ ڈاکٹر سروش لودھی نے بحیثیت وائس چانسلر این ای ڈی دو ٹینور(آٹھ سالہ مدّت) میں فرائض انجام دیئے۔ ان کی گراں قدر خدمات کو سراہتے ہوۓ انہیں تمغہ حُسنِ کارکردگی سے بھی نوازا گیا۔ ان کی آٹھ سالہ ولولہ انگیز قیادت میں جامعہ نے ترقی کی منازل طے کیں۔ الوداعی تقریب میں بڑی تعداد میں اساتذہ و اسٹاف نے شرکت کی اور پھول نچھاور کرکے اپنے ہر دل عزیر وائس چانسلر کو دعاؤں کے ساتھ رخصت کیا۔ جب کہ اس موقعے پر ڈاکٹر سروش حشمت لودھی نے چارج قایم مقام وائس چانسلر ڈاکٹر نعمان احمد کے سپرد کیا۔ تقریب میں وائس چانسلر آئی بی اے سکھر پروفیسر ڈاکٹر آصف احمد شیخ سمیت آئی ای پی کے چئیرمین انجینئر سہیل بشیر، انجینئر عباس ساجد، انجینئر ایاز مرزا اور پی ای سی کے نمائندگان نے بھی شرکت کی۔