جیل بھرو تحریک: پی ٹی آئی قیادت نے بدھ سے شروع ہونے والی تحریک کا ویڈیو ٹیزر جاری کردیا
واضح رہے کہ جمعرات کے روز سابق وزیراعظم اور چیئرمین تحریک انصاف نے بدھ کے روز سے جیل بھرو تحریک شروع کرنے کا اعلان کیا تھا۔
پاکستان تحریک انصاف نے جیل بھرو تحریک کے لیے ویڈیو پیغام جاری کردیا ہے۔ تمام سینئر لیڈرشپ کے پیغامات پر مشتمل ویڈیو کا ٹیزر ریلیز کردیا گیا۔
سوشل میڈیا پر جاری کی گئی ویڈیو میں چیئرمین تحریک انصاف عمران خان ، وائس چیئرمین شاہ محمود قریشی ، سابق وفاقی وزیر اسد عمر ، رہنما تحریک انصاف شیریں مزاری ، سینئر رہنما اور سابق وفاقی وزیر فواد چوہدری اور رہنما پی ٹی آئی شہباز گل سمیت دیگر اہم رہنماؤں کے بھی جیل بھرو تحریک کے حوالے سے پیغامات سنائے گئے ہیں۔
یہ بھی پڑھیے
جمائما گولڈ اسمتھ نے پاکستان سے محبت میں کیا کرلیا؟
بھارت 2 ماہ میں چین کو کس میدان میں پیچھے چھوڑ سکتا ہے؟
واضح رہے کہ جمعرات کے روز سابق وزیراعظم اور چیئرمین تحریک انصاف نے بدھ کے روز سے جیل بھرو تحریک شروع کرنے کا اعلان کیا تھا اور گذشتہ روز پی ٹی آئی کی اعلیٰ قیادت کی جانب سے جیل بھرو تحریک کا شیڈول جاری کیا گیا تھا۔
جیل بھرو تحریک کا شیڈول
شیڈول کے مطابق 22 فروری بروز بدھ سے یکم مارچ تک روزانہ 200 کارکنان رضاکارانہ طور پر گرفتاریاں دیں گے۔
جب بادل جبر کا گہرا ہو،
اور سوچوں تک پر پہرہ ہو!
جہاں قفل لگے ہوں ہونٹوں پر،
اور سچ بھی جرم ہی ٹہرا ہو!
۔
۔
۔
اس آزادی سے بہتر ہے،
جیل چلو، اور خوف کے بت توڑو! pic.twitter.com/8zb5LSYIY8— PTI (@PTIofficial) February 18, 2023
پاکستان تحریک انصاف کی جانب سے جاری کردہ شیڈول کے مطابق 200 کارکنان کے ہمراہ سابق اراکین قومی و صوبائی اسمبلی کا چھ رکنی گروپ بھی گرفتاری دے گا۔
پاکستان تحریک انصاف کی اعلیٰ قیادت کے مطابق گرفتاریاں نہ ہونے کی صورت میں کارکنان اور ارکان اسمبلی مقررہ مقام پر دھرنا دیں گے۔
پاکستان تحریک انصاف کے اعلامیے کے مطابق 22 فروری کو شاہراہِ قائد اعظم لاہور پر گرفتاریاں پیش کی جائیں گی ، 23 فروری کو پشاور ، 24 کو راولپنڈی ، 25 فروری کو ملتان اور 26 فروری کو گوجرانولہ کے کارکنان گرفتاریاں دیں گے۔
جاری شیڈول کے مطابق 27 فروری کو سرگودھا ، 28 فروری ساہیوال اور یکم مارچ کو فیصل آباد میں رضاکارانہ گرفتاری دی جائے گی۔
پاکستان تحریک انصاف کے اعلامیے کے مطابق 22 فروری کو لاہور میں دی جانے والی رضا کارانہ گرفتاری کے لیے کارکنان کی فہرست تیار کرلی گئی ہے۔
پی ٹی آئی اعلامیے کے مطابق لاہور میں سابق گورنر پنجاب عمر سرفراز چیمہ ، ارکان اسمبلی کے گروپ کے ہمراہ گرفتاری پیش کریں گے۔ لاہور سے تعلق رکھنے والے سابق ارکان قومی و صوبائی اسمبلی کے ناموں پر مشاورت جاری ہے۔
پی ٹی آئی کے اعلامیے میں کہا گیا ہے کہ رضاکارانہ گرفتاری پیش کرنے والے ارکان قومی و صوبائی اسمبلی کے ناموں کی حتمی منظوری عمران خان دیں گے۔
