حکومت غریب آدمی کو سو روپے کم پر پیٹرول مہیا کرے گی، مصدق ملک

وزیر مملکت برائے پٹرولیم ڈاکٹر مصدق ملک  نے کہا ہے کہ دو پاکستان ہیں ایک طاقتور اور دوسرا غریب و کمزور کا پاکستان ہے، ایک وہ پاکستان جہاں روٹی چوری کرنے پر جیل اور دوسرا مجرم ایسا جس کے لئے عدالتیں بلاتی رہیں تو کہتے ہم پر قانون لاگو نہیں ہوتا۔

ان خیالات کا اظہار مصدق ملک نے لاہور میں پریس کانفرنس کرتے ہوئے کیا۔ ان کا کہنا تھا کہ بنی گالہ چار سو کنال کی کوٹھی ہے جو عمران خان کی ہے ، جرات کیسے ہوئی پولیس کو وہاں بھیجنے کی ، بنی گالہ کے باہر بیٹھے کارکن ملک و قانون کی ایسی تیسی کررہے ہیں۔ عمران خان کہتے ہیں جو آئین و قانون میں لکھا ہے تو کیا وہ مجھ پر لاگو ہوگا، آئین ہوگا کہیں لیکن مجھ پر لاگو نہیں۔ گلبرگ کلفٹن میں رہنے والوں کی بھی عزت ہے لیکن غریب کی نہیں ہے۔

یہ بھی پڑھیے

چیف آف دی نیول اسٹاف انٹرنیشنل سیلنگ ریگاٹا 2023 کی افتتاحی تقریب

چیف آف دی نیول اسٹاف انٹرنیشنل سیلنگ ریگاٹا 2023 کی اختتامی تقریب

وزیر مملکت برائے پیٹرولیم مصدق ملک کا کہنا تھا کہ وزیراعظم نے کہا امیر و غریب کے پاکستان میں غریب کے ساتھ کھڑے ہوجاؤ۔

وزیر مملکت برائے پیٹرولیم کا کہنا تھا کہ ہم نے امیر اور غریب کے لیے گیس کا ٹیرف الگ الگ کردیا ہے۔ ایک ہفتہ پہلے وزیراعظم نے حکم دیا کہ غریب و امیر کے پیٹرول کی پرائسز الگ الگ کر دیں، نواز شریف کے حکم پر وزیراعظم کو اسکیم دی ہے غریب کے لیے پیٹرول سستا کردیا جائے گا۔ تمام موٹر سائیکل سواروں کے لیے قیمت کم کردی جائے گی، چھ ہفتوں میں پیٹرول کم کرنے کی اسکیم کا وقت دیا گیا ہے۔ بغیر سبسڈی کے غریب کا پیٹرول سستا کر دیں گے۔

مصدق ملک کا کہنا تھا کہ مڈل کلاس کا نوجوان جس کے تین چار بچے ہیں سبزی کی ٹوکری پکڑی ہوئی ہے ان کا پاکستان الگ کر دیا ہے،  ڈالے والی گاڑیاں آگے پیچھے نقاب والے اب تیل کی زیادہ قیمت دیں گے۔

ان کا کہنا تھا کہ کم قیمت گیس کا فیصلہ جنوری اور کم قیمت پیٹرول کا فیصلہ چھ ہفتوں میں ہوجائے گا، جن کو اللہ نے دیا ان سے لیں گے غریبوں کو سہولت دیں گے، ایک سال یا ایک دن رہیں گے لیکن عوام کو ریلیف دیں گے۔

مصدق ملک کا کہنا تھا کہ یہ کسی کے باپ کا ملک نہیں بائیس سے اکیس کروڑ غریب لوگ ہیں ، ٹارگٹ دیدیا امیر و غریب کے درمیان گیس و پیٹرول کا سو روپے کا فرق ہونا چاہئیے۔

سابق چیف جسٹس ثاقب نثار سے متعلق گفتگو کرتے ہوئے مصدق ملک کا کہنا تھا کہ مبینہ آڈیو سابق چیف جسٹس ثاقب نثار کی سامنے آئی ہے یہ فیصلے لکھتے تھے باپ کے سامنے بیٹی کو گھسیٹ کر جیل بھیجا گیا۔

مصدق ملک کا کہنا تھا کہ ایک شخص جو خود کو چیف جسٹس کہتا رہا لیکن اپنی کرسی کی حیا نہ کر سکے، بھگت سنگھ کے دوسرے مانگنے والے کہہ رہے ٹھوک دیں گے، عورت کو ٹھوک دو ثاقب نثار کہہ رہے ہیں جو بھگت سنگھ کے ماننے والے کہہ رہے ہیں۔

ان کا مزید کہنا تھا کہ مصدق ملک قتل کی سازش کس کو کہتے ہیں ایک شخص دوسرے کو کہہ رہا ٹھوک دو، کیا ملک ہے کیا گفتگو ہے، ایک کہتا کہ عدالت نہ وارنٹ نہ پولیس لگتی دوسرا کہتا عورت کو ٹھوک دو۔

مصدق ملک کا کہنا تھا کہ وزیر داخلہ کو کہوں گا آڈیو کی تحقیقات ہونی چاہیے ، اگر ٹیپ ٹھیک ہے اگر مبینہ طور پر دوسرے نے کہا ٹھوک دو تو اس کی انویسٹی گیشن ہونی چاہیے اگر قتل کی پلاننگ ہے تو مقدمہ درج ہونا چاہیے۔

وزیر مملکت برائے پیٹرولیم کا کہنا تھا کہ تمام لوگوں کو کہوں گا اپنی حیا نہ کریں اپنے منصب کی حیا کریں۔

ان کا کہنا تھا کہ رمضان پیکج سامنے آیا ہے ماہ رمضان میں آٹے پر بدتہذیبی کا نوٹس لے لیا گیا ہے۔

عمران خان پر تنقید کرتے ہوئے مصدق ملک کا کہنا تھا کہ توشہ خانہ سے عمران خان نے تحفے لیکر آکشن کی قیمت بڑھا دی، کوئی دوست ملک توشہ خانہ تحفوں کی فروخت پر ناراض نہیں ہوا لیکن تحائف کو آکشن کر دینا چاہیے۔

ایک سوال کے جواب میں مصدق ملک کا کہنا تھا کہ گیس کا سرکلر ڈیڈ سترہ سو ارب روپے ختم کر دیا گیا، ایل این جی پر کام کررہے ہیں ، گیس کے ٹیرف میں یہ ہو نہیں سکتا کہ کم قیمتوں کا اعلان کردیں تو پھر واپس لے لیں، حکومت پالیسی سے پتہ چل جانا چاہئیے کہ کس پاکستان کے ساتھ کھڑے ہیں۔

مصدق ملک نے خبردار کرتے ہوئے کہا کہ توشہ خانہ پر ہمارے دوست نے بھی کوئی فائدہ لیا تو اسے جواب دینا ہوگا، توشہ خانہ سے تحفہ لینے والے کو پوری رقم دینا ہوگی۔

سستے پیٹرول کے حوالے سے مصدق ملک کا کہنا تھا کہ سستا پیٹرول کےلئے گاڑیوں اور موٹر سائیکل کو ان کے شناختی کارڈ کے ڈیٹا پر پیغام آجائے گا ، موٹر سائیکل کو روزانہ کی بنیاد پر دو یا تین لیٹر سے زیادہ پیٹرول نہیں دیں گے، غریب کو اکیس لیٹر پیٹرول کی ضرورت ہے دو سے تین لیٹر ہی وہ لے سکے گا۔

ان کا کہنا تھا کہ گاڑی والے کو تیس لیٹر تک سبسڈی دیں گے، کبھی نہیں کہا مارچ میں روس سے تیل آئے گا کہا تھا کہ اپریل میں آرڈر دیں گے ، روس سے تیل کی خریداری کےلئے بات چیت کررہے ہیں، ایران سے تیل پر کوئی اعتراض نہیں کوئی بھی ایسا طریقہ تیل کی قیمت سستی ہوں لیکن پابندیاں نہ لگیں، اپنے فیصلے خود کریں گے دوسرا ملک نہیں کرے گا، تیل کے لئے بین الاقوامی پابندیاں نہیں لگنے چاہیے۔