گجرات میں معذور لڑکی کی لاش قبر سے نکال  کر بے حرمتی

پنجاب کے ضلع گجرات میں انسانیت سوز واقعہ پیش آیا ہے۔ شیطان صفت ملزمان نے 18 سالہ ذہنی و جسمانی معذور لڑکی کی لاش قبر سے نکال کر بے حرمتی کرڈالی۔

لڑکی کے ورثا نے واقعے کا مقدمہ درج کروادیا ہے۔وزیراعلیٰ پنجاب حمزہ شہبازش نے واقعے کا نوٹس لیتے ہوئے ملزمان کی فوری گرفتاری کے احکامات جاری  کردیے۔پولیس نے 12 مشکوک افراد کو حراست میں لے لیا۔پوسٹ مارٹم کے بعد لاش کو دوبارہ سپردخاک کردیاگیا۔

یہ بھی پڑھیے

پشاور:شادی کے28سال بعد پیدا ہونے والا اکلوتا بیٹا ہوائی فائرنگ کی نذر

عید کی خوشی ماتم میں بدل گئی، بہن نے بہن کو قتل کردیا

متوفیہ  کے ماموں نے  ایف آئی آرمیں موقف اپنایا ہے کہ قصبہ ٹانڈہ سے 15 کلو میٹر دورواقع گاؤں چک کمالہ میں میری ذہنی و جسمانی معذور بھانجی  4 مئی کو انتقال  کرگئی تھی جسے اسی روز شام 6 بجے مقامی قبرستان میں سپردخاک کردیا گیا تھا۔ گزشتہ روز  5مئی کو صبح 7 بجے اہل خانہ فاتحہ خوانی کے لیے قبرستان پہنچے تو قبر کھلی ہوئی تھی اور لاش غائب تھی۔

ایف آئی آر کے مطابق ورثا  نے اردگرد لاش کی تلاش شروع کی تو 25 میٹر دور دو پکی قبروں کے درمیان  لڑکی کی برہنہ لاش پڑی ہوئی تھی۔ واقعے کی اطلاع  جنگل کی آگ کی طرح پھیل گئی ۔اطلاع ملنے پر پولیس بھی موقع پر پہنچی اور شواہد اکٹھے کرنے کے بعد متوفیہ کے ماموں کی مدعیت میں مقدمہ درج کرلیا۔

 وزیراعلیٰ پنجاب حمزہ شہباز شریف نے صوبہ پنجاب کے ضلع گجرات میں معذور لڑکی کی لاش کی بے حرمتی کے واقعے کا نوٹس لے لیا۔پولیس   قبرستان اور اس کے گرد و نواح کے علاقوں  میں ملزمان کی تلاش کر رہی ہے، گجرات کے تھانہ ٹانڈہ کے ایس ایچ او ظفر اقبال  کا کہنا ہے کہ  اب تک 12 مشکوک افراد کو حراست میں لیا گیا ہے۔پولیس کے مطابق ملزم کا تعلق اسی گاؤں سے ہو سکتا ہے لہٰذا گاؤں کے تمام گھروں کے بالغ مردوں کا ڈیٹا حاصل کیا جا رہا ہے۔

ایس ایچ او ظفر اقبال نے بتایا کہ لاش کا ڈی ایچ کیو ہسپتال گجرات سے پوسٹ مارٹم کروایا گیا ہے جس میں لاش پر کوئی زخم وغیرہ نہیں پایا گیا۔پولیس اہلکار کا کہنا ہے کہ پوسٹ مارٹم کے دوران لاش کے اجزا حاصل کر کے حتمی تجزیے اور رپورٹ کے لیے پنجاب کیمیکل ایگزامینر لاہور بھجوا دیے گئے ہیں۔

ایس ایچ او نے مزید بتایا کہ معذور بچی کی لاش کا پوسٹ مارٹم اور دیگر قانونی کارروائیاں مکمل ہونے کے بعد پولیس کے سخت حفاظتی پہرے میں گزشتہ روز  جمعرات کو اسے دوبارہ سپرد خاک کر دیا گیا تھا۔