عمران خان نے مشکل وقت میں پاکستان کیخلاف سازش کی، مفتاح اسماعیل

وفاقی وزیر خزانہ مفتاح اسماعیل نے تحریک انصاف کے رہنما شوکت ترین ،پنجاب اور خیبرپختونخوا کے وزرائے خزانہ کی مبینہ لیک آڈیو ٹیپ پر ردعمل دیتے ہوئے الزام عائد کیا ہے کہ عمران خان ، شوکت ترین اور تیمور جھگڑا نے مشکل وقت میں پاکستان کے خلاف سازش کی۔

اسلام آباد میں پریس کانفرنس کرتے ہوئے مفتاح اسماعیل نے کہا کہ پاکستان ڈوب رہا ہے، اس وقت اللّٰہ کے بعد آئی ایم ایف کا سہارا ہے ، شوکت ترین نے محسن لغاری اور تیمور جھگڑا کو فون کیا، اسد عمر اس کا دفاع کررہے ہیں۔

یہ بھی پڑھیے

شوکت ترین اور تیمور جھگڑا کی مبینہ آڈیو لیک، کتنی حقیقت کتنا فسانہ؟

نواز شریف کے ترجمان نے عمران خان پر دہشتگردی کے مقدمے کو غلط قرار دیدیا

انہوں نے کہا کہ 72  گھنٹے پہلے آئی ایم ایف کو خط لکھ دیا گیا،کیا ہم پاگل ہیں ہمیں سب پتا ہے،الٹا چور کوتوال کو ڈانٹے، پھر خط پر ایک دوسرے کا دفاع کر رہے ہیں۔

سن لغاری نے شوکت ترین سے پوچھا تھا کیا اس سے ملک کو نقصان ہوگا، محسن لغاری کے سوال پر شوکت ترین نے آئیں بائیں شائیں کی، اس لیے سیاستدان بنے تھے؟ ریکارڈنگ چل رہی ہے، اللّٰہ رسول کا خوف کرو، پاکستان کے ساتھ یہ کررہے ہو۔ مفتاح اسماعیل نے اپنے پیش رو کو سیاست چھوڑںے کا مشورہ بھی دیدیا۔

مفتاح اسماعیل نے مزید کہا کہ کیا عمران خان کی حکمرانی کی ہوس پر پاکستان کی بلی چڑھا دیں؟ کیا چیئرمین پی ٹی آئی پاکستان سے بڑے ہوگئے ہیں؟ کیا پاکستان کا نام بنی گالہ رکھ دیں؟ ان کو شرم نہیں آئی، ایک دن پہلے اس کی روداد فواد چوہدری بتا چکا تھا۔

 وزیرخزانہ کا کہنا تھا کہ حکومت لینےسے پہلے میں نے شہبازشریف کو کہا تھا کہ ملک دیوالیہ ہوچکا، یہ لوگ پاکستان کو دیوالیہ پن پر لےگئے، آئی ایم ایف سے معاہدہ کرکےتوڑا، آج یہ بات طے ہوگئی کہ مفتاح اسماعیل جو کہہ رہا تھا وہ درست تھا، ہم نے اس ملک کو دیوالیہ ہونےسے بچایا، سیاسی کیپٹل کو داؤ پر لگایا، انہی کا پروگرام میں نے آئی ایم ایف سے اٹھایا۔

انہوں نے کہاکہ ہم نے سیلز ٹیکس آج بھی زیرو رکھا ہے ،آج میں قیمتیں بڑھاتا ہوں تو شوکت ترین اور اسدعمر تنقید کرتے ہیں، میری اپنی پارٹی کے لوگ بھی مجھ پر تنقید کرتے ہیں، ہم اپوزیشن میں بھی ملک کو دیوالیہ نہیں ہونے دیں گے۔

مفتاح اسماعیل نے کہا کہ ملک کے ساتھ یہ حرکت کررہے ہیں، سیاست کے لیے ہر چیز قربان کردیں گے؟ عمران خان نے اقتدار میں آکے کیا تیر چلایا،ان کو پاور میں آنے کی کیا ضرورت ہے، انہوں نے 10 سال میں جھوٹ بولنے کے علاوہ کے پی میں کیا کیا ہے؟

وزیر خزانہ کا کہنا تھاکہ ملک کے خلاف سازش کرتے ہو، شرم آنی چاہیے، آپ تمام حدیں پار کرچکے ہیں، شوکت ترین نے آڈیو میں کہا کہ عمران خان سے بات ہوئی ہے، کیا میرے اکیلے کا پاکستان ہے؟ تمہارا نہیں ہے؟ کیا تمہارا پاکستان نہیں ڈوبے گا ؟

انہوں نے کہا کہ  اگر ملک نہیں ہو گا تو پی ٹی آئی بھی نہیں ہو گی،  اگر ہم اپوزیشن میں ہوتے تب بھی ملک کو ڈیفالٹ ہونے سے بچاتے،گزشتہ حکومت نے پونے چار سال میں بیس ہزار ارب روپے کا قرض چڑھایا، اگر ہم ملک کو نہ بچاتے تو ہماراملک سری لنکا بن چکا ہوتا۔