آئی ٹی برآمدات میں غیرمعمولی نمو حاصل کرکے معیشت کو سنبھالا دیں گے، اسحاق ڈار

وزیر خزانہ سینیٹر محمد اسحاق ڈار اور وزیر برائے اقتصادی امور جناب ایاز صادق نے ممتاز پاکستانی نژاد امریکی آئی ٹی/ٹیک انٹرپرینیورز کے ساتھ ایک بامقصد ملاقات کی ہے۔

واشنگٹن ڈی سی : 16 اکتوبر 2022 کو ہونے والی ملاقات میں ایم او ایس برائے فنانس اینڈ ریونیو محترمہ عائشہ غوث پاشا ، گورنر اسٹیٹ بینک آف پاکستان جناب جمیل احمد ، امریکا میں پاکستان کے سفیر مسعود خان اور پاکستانی وفد کے دیگر اراکین بھی شامل تھے۔

یہ بھی پڑھیے

21 اکتوبر کو پاکستان کے فیٹف کی گرے لسٹ سے نکلنے کا اعلان متوقع

سندھ حکومت نے پیپلز بس سروس کے کرائے میں 100فیصد اضافہ کردیا

وزیر خزانہ نے کہا کہ پاکستان کی معیشت کو مستحکم کرنا حکومت کی اولین ترجیح ہے۔ اس مقصد کے لیے حکومت نے گزشتہ چند مہینوں میں سخت فیصلے کیے تھے جو پاکستان کو معاشی بحالی کی راہ پر ڈالنے کے لیے ضروری تھے۔

سینیٹر اسحاق ڈار کا کہنا تھا کہ تباہ کن سیلاب نے مشکلات میں اضافہ کر دیا تھا لیکن حکومت کو یقین تھا کہ دانشمندانہ پالیسیوں کے ذریعے پاکستان کی معیشت کو درپیش چیلنجز پر قابو پا لیا جائے گا۔

وزیر خزانہ نے پاکستان کے آئی ٹی سیکٹر کو مضبوط بنانے میں پاکستانی نژاد امریکی ٹیک انٹرپرینیورز کی دلچسپی کو سراہا اور اس بات پر زور دیا کہ اس شعبے میں ترقی کے بے پناہ امکانات ہیں اور یہ پاکستان کی معیشت کو مضبوط بنانے میں اہم کردار ادا کر سکتا ہے۔

ان کا کہنا تھا کہ حکومت آئی ٹی/ٹیک سیکٹر پر ترجیحی توجہ دے رہی تھی اور پاکستان کے ٹیک سیوی نوجوان ایک بہت بڑا ذریعہ ہیں جنہیں آئی ٹی سیکٹر کی ترقی کے لیے بہترین طریقے سے استعمال کرنے کی ضرورت ہے۔

وزیر خزانہ نے شرکاء کو یقین دلایا کہ پاکستان آنے والے سالوں میں اپنی آئی ٹی برآمدات میں غیرمعمولی نمو حاصل کرنے کے لیے ان کی کوششوں میں حکومت کی طرف سے مکمل تعاون فراہم کرے گا۔

اس موقع پر پاکستانی نژاد امریکی آئی ٹی/ٹیک انٹرپرینیورز نے آئی ٹی/ٹیک سیکٹر پر حکومت کی توجہ کو سراہا اور پاکستان میں سرمایہ کاری میں اپنی دلچسپی کے عزم کااعادہ کیا۔

انہوں نے آئی ٹی سیکٹر کی ترقی بالخصوص پاکستان سے برآمدات کو مزید فروغ دینے کے لیے متعدد تجاویز پیش کیں۔

وزیر خزانہ اسحاق ڈار نے یقین دلایا کہ ان کی تجاویز کی مناسب پیروی کے لیے بغور جائزہ لیا جائے گا اور ان پر زور دیا کہ وہ پاکستان کے آئی ٹی سیکٹر میں مضبوط ترقی کو یقینی بنانے کے لیے حکومت کے ساتھ منسلک رہیں جو ہماری صلاحیت کے مطابق ہے۔