اداکاروں اور کھلاڑیوں کی اے آر وائی لاگونا کی منفرد تشہیر

ہمایوں سعید، فہد مصطفیٰ اور عماد وسیم کی واٹس ایپ پر ہونے والی گفتگو وائرل کردی گئی۔

سوشل میڈیا پر کاروباری منصوبوں کی مارکیٹنگ کے غیر روایتی طریقے مقبول ہونے لگے ہیں۔ پاکستان کی معروف شخصیات نے سماجی رابطوں کی ویب سائٹ ٹوئٹر پر پیغامات کے ذریعے اے آر وائی لاگونا کی تشہیر کی۔

معاملہ پاکستانی اداکار ہمایوں سعید، فہد مصطفیٰ اور کرکٹرعماد وسیم کے درمیان ہونے والی واٹس ایپ چیٹ سے شروع ہوا۔ ٹوئٹر پر ایک صارف نے واٹس ایپ لیکس کے تبصرے کے ساتھ تینوں کی ملاقات کے حوالے سے کی جانے والی بات چیت کا اسکرین شاٹ وائرل کردیا۔

گفتگو پر کمنٹ کرتے ہوئے کرکٹر محمد عامر نے ٹوئٹ کیا کہ جو ہونا تھا ہوگیا، اپنے اور قوم کے لیے آگے کے واٹس ایپ بچاؤ، چلو مل کے بات کرو۔

یہ بھی پڑھیے

سمیع خان، یشما گل اور زارا نور کی منفرد تشہیری مہم

فہد مصطفیٰ نے اسکرین شاٹ کو کوٹ ٹوئٹ کرتے ہوئے لکھا یہ سب کیا ہے ہمایوں سعید بھائی؟ جس پر ہمایوں سعید نے کہا کہ مجھے لگا یہ سب تمھارا کیا دھرا ہے۔

دوسری جانب عماد وسیم نے کہا کہ وہ ان دنوں آسٹریلیا میں ہیں، واپس آکر ملاقات کریں گے۔ جس پر فہد مصطفیٰ نے کہا کہ کہاں ؟ لاگونا میں؟

ہمایوں سعید نے جواب میں لکھا نہیں، آپ کے گھر آخر لاکھوں کی بات ہے۔ اداکار نے لاگونا پروجیکٹ کی تشہیر کرتے ہوئے اس پیغام کے ساتھ ہیش ٹیگ ‘لاؤ لاگونا’ بھی لکھا۔

محمد عامر نے فہد مصطفیٰ اور ہمایوں سعید کو کہا کہ ملاقات طے رہی جبکہ عماد وسیم سے مخاطب ہوکر کہا کہ آپ کو آن لائن لے لیں گے۔

اے آر وائی گروپ سے وابستہ مشہور شخصیات کے مابین اس گفتگو سے واضح ہورہا ہے کہ یہ اے آر وائی کے نئے پروجیکٹ لاگونا کی تشہیر کے لیے بنایا گیا ایک پلان ہے۔

چاروں شخصیات نے اشارہ دیا ہے کہ اس پروجیکٹ میں ان کے گھر بھی شامل ہیں تاکہ شہریوں کی منصوبے میں سرمایہ کاری میں دلچسپی پیدا ہو۔

متعلقہ تحاریر