شہزاد رائے نے ہنزہ کےمحروم بچوں کی خواہش پوری کردی

معروف گلوکار اور سماجی کارکن شہزاد رائے  نے  موسیقی کے آلات سے محروم ہنزہ کے بچوں کی بہترین پرفارمنس سے متاثر ہوکربچوں کے موسیقی کے تمام آلات بطور تحفہ پہنچا دیئے۔

گذشتہ ماہ معروف گلوکار نے سماجی رابطوں کی ویب سائٹ ٹوئٹرپر پاکستان کے نامعلوم مقام کے بچوں کی ایک ویڈیو شیئر کی تھی جس میں بچے موسیقی کے آلات کے بغیر بہترین بینڈ پرفارمنس دے رہے تھے، شہزاد رائے نے ویڈیو شیئر کرتے ہوئے لوگوں سے درخواست کی تھی کہ اگر کوئی بھی ان بچوں کے حوالے سے معلومات رکھتا ہے تو ان کو آگاہ کرے وہ ان  باصلاحیت بچوں جو موسیقی کے آلات کے بغیرعمدہ فن کا مظاہرہ کررہے ہیں ان کو موسیقی کے آلات فراہم کریں گے۔

مزید پڑھیے

شہزاد رائے کو بچوں کے بینڈ کی تلاش

شہزاد رائے نے اپنے نئے ویڈیو پیغام میں آگاہ کیا ہے کہ ان بچوں کا تعلق ہنزہ سے ہے جنھیں موسیقی کے تمام آلات بطور تحفہ دیئے گئے ہیں، انھوں  نے ان بچوں کی تلاش میں مدد کرنے والے عاصم اور اسد  کا شکریہ ادا کیا جنہوں نے ان بچوں کو تلاش کرنے اور ان تک موسیقی کے آلات پہنچانے میں مدد کی، انھوں نےبتایا کہ یہ ویڈی بہت پرانی ہے اور یہ  بچے اب بڑے ہوچکے ہیں  تاہم خوشی ہے کہ انھیں تحفہ پہنچ گیا۔

Mission accomplished!!!!Instruments delivered to young talented Hunza boys !!! Thanks to Asim and Asad bhai… Special thanks to @WithRider pic.twitter.com/GqmzlTikVf

— Shehzad Roy (@ShehzadRoy) September 22, 2021

شہزاد رائے نے اپنے ٹوئٹر پر ایک اور ویڈیو شیئر کی جس میں ایک شخص ورک شاپ پر کام کرنے والے بچے پر بہیمانہ تشدد کررہا ہے انھوں نے اپنے مداحوں سے درخواست کی اس بچے کی تفصیلات فراہم کرنے میں مدد کریں تاکہ اس ظلم کو روکنے کے لئے قانونی کارروائی کی جاسکے، شہزاد رائے کے ٹوئٹ کے جواب میں صحافی ضرار کھوڑونے اس کی تفصیلات  شیئر کرتے ہوئے بتایا کہ یہ کیس پنجاب پولیس نے حل کرلیا ہے اور ذمہ دار شخص کو گرفتار کرلیا گیا ہے،۔

زندگی ٹرسٹ کے سربراہ گلوکار شہزاد رائے کی جانب سے بچوں کی تعلیم پر خصوصی توجہ کے ساتھ ساتھ  چائلڈ لیبر قوانین کے خلاف بھرپور انداز میں آواز اٹھانے پر مداحوں کی جانب سے سراہا جارہا ہے، واضح رہے کہ گزشتہ سال شہزاد رائے نے اسلام آباد ہائیکورٹ میں ایک درخواست داخل کی تھی جس میں بچوں پر تشدد اور جسمانی مشقت پابندی کی درخواست کی گئی تھی۔