سندھ ہائیکورٹ نےایف آئی اے کو حریم شاہ کے خلاف کارروائی سے روک دیا

سندھ ہائیکورٹ نےایف آئی اے کو ٹک ٹاک اسٹار حریم شاہ کے خلاف کارروائی سے روک دیا۔ عدالت  نے ڈپٹی اٹارنی جنرل اور ایف آئی اے کے تفتیشی افسر کو آئندہ سماعت کیلیے نوٹس جاری کردیے۔

حریم شاہ نے ایف آئی اے کی کارروائی کے خلاف وکیل کے ذریعے سندھ ہائیکورٹ سے رجوع کیا تھا۔

یہ بھی پڑھیے

حریم شاہ نے اکاؤنٹس منجمد کرنے پر منی لانڈرنگ کے ثبوت مانگ لیے

متنازع ٹک ٹاک اسٹار حریم شاہ کی برطانیہ میں ’ہوٹ واٹر سوئمنگ‘

حریم شاہ نے درخواست میں مؤقف اختیار کیا کہ غیر ملکی کرنسی کے خلاف میری ویڈیو وائرل ہوئی تھی، کرنسی کے حوالے سے وضاحتی ویڈیو جاری کرچکی ہوں۔

وکیل نے مؤقف اختیار کیا کہ اطلاعات کے مطابق ایف آئی اے نے حریم شاہ کے بینک اکاؤنٹس منجمد کرنے کے لیے  بینکوں سے رجوع کیا ہے، وہ ایف آئی اے سے انکوائری میں تعاون کرنا چاہتی ہیں اور برطانیہ سے واپسی پر گرفتاری کا خدشہ ہے لہٰذا ایف آئی اے کو کارروائی سے روکا جائے۔

سندھ ہائیکورٹ نے اپنے  حکم میں کہا  ہے  کہ بظاہر درخواست گزار اس وقت برطانیہ میں مقیم ہیں اور مقررہ تاریخ تک پاکستان نہیں پہنچ سکیں گی۔عدالت نے منی لانڈرنگ انکوائری میں ایف آئی اے کو حریم شاہ کے خلاف کارروائی سے روکتے ہوئے ڈپٹی اٹارنی جنرل اور ایف آئی اے کو نوٹس جاری کرتے ہوئے آئندہ سماعت پر طلب کیا ہے ۔

حریم شاہ نے سوشل میڈیا پر ایک وڈیو شیئر کی تھی جس میں وہ  برطانوی پاؤنڈز  کی گڈیاں لیے بیٹھی تھیں،ٹک ٹاک اسٹار نے دعویٰ کیا تھا کہ وہ یہ رقم پاکستان سے لے کر آئی ہیں اور کسی نے انہیں روکنے کی کوشش نہیں کی۔وڈیو سامنے آنے کے بعد ایف آئی اے نے حریم شاہ کو 19 جنوری کو تحقیقات کے لیے طلب کیا تھا۔