پاکستانی سینما گھروں میں بین الاقوامی فلمیں دیکھنے کے لیے تیار ہوجائیں

فواد چوہدری نے سینما انڈسٹری کی بحالی کے لیے اہم اعلان کردیا، ان کا کہنا ہے کہ پاکستان میں بین الاقوامی ممالک کی فلمیں نمائش کے لیے پیش کی جاسکیں گی۔

وفاقی وزیر اطلاعات فواد چوہدری نے کل پریس کانفرنس کرتے ہوئے ملک میں سینما انڈسٹری کی بحالی کا اشارہ دے دیا۔ انہوں نے کہا کہ "کینیڈین پنجابی، ایرانی اور ترکش فلموں کو دکھانے کی اجازت دے رہے ہیں، سینماز کو بجلی اور ٹیکسز پر ریلیف دے رہے ہیں”۔

سینما کے شعبے کی ترقی کیلئے علاقائی ملکوں سے فلموں کی نمائش کی اجازت دے رہے ہیں۔ سینماز میں کینیڈین پنجابی، ایرانی اور ترکش فلمیں دکھانے کی اجازت دے رہے ہیں تاکہ سینما انڈسٹری کی بحالی ممکن ہو۔ اس کے علاوہ سینماز کو مراعات جیسے بجلی اور ٹیکسز پر ریلیف دے رہے ہیں۔@fawadchaudhry pic.twitter.com/IUprCyD0Tf

— Fawad Chaudhry (Updates) (@FawadPTIUpdates) September 21, 2021

وزیر اطلاعات کا یہ بیان ایسے وقت میں نہایت حوصلہ افزا ہے کہ جب ہماری سینما انڈسٹری ایک بحران سے گزر رہی ہے جس کا ذکر فواد چوہدری نے اپنی پریس کانفرنس میں بھی کیا۔

یہ بھی پڑھیے

ارمینا خان کی شارٹ فلم گولڈ مووی ایوارڈ کے لیے نامزد

اس بحران کی ایک بڑی وجہ حالیہ دنوں میں کورونا وائرس کی وجہ سے نافذ کردہ لاک ڈاؤن اور ایس او پیز ہیں جس کے سبب ملک بھر میں سینما گھر مہینوں سے بند پڑے ہیں۔

سینما مالکان نے کئی بار حکومت سے احتجاج کیا کہ جب دیگر کاروبار کرنے والوں کو شرائط کے ساتھ کام کرنے کی اجازت دے دی گئی ہے تو سینماز پر لگے تالے بھی کھولے جائیں۔

اس حوالے سے فواد چوہدری کا کہنا تھا کہ نیشنل کمانڈ اینڈ آپریشنل سینٹر کی مشاورت سے سینما کھولنے کا حتمی فیصلہ کیا جائے گا، انہوں نے کہا کہ کورونا وائرس کیسزمیں کمی آرہی ہے اور اب اس متعلق فیصلہ کرلیا جائے گا۔

فلم انڈسٹری اور سینما کو اس وقت حکومتی سرپرستی کی شدید ضرورت ہے، پچھلے برس سے بند پڑے سینما اور تھیٹرز کی وجہ سے نوبت یہاں تک آگئی تھی کہ حکومت پنجاب نے صوبائی سطح پر آرٹسٹ سپورٹ فنڈ قائم کیا اور فنکاروں کو ماہانہ اخراجات کی مد میں رقم فراہم کی۔

روشنیوں کے شہر کراچی میں پچھلے چند برسوں کے دوران جدید سینما گھر تعمیر ہوئے۔ کئی سینما گھروں سے متعلق عدالتی ریمارکس میں کہا جاچکا ہے کہ یہ غیرقانونی زمین پر تعمیر کیے گئے۔

فواد چوہدری کو اس جانب بھی توجہ دینی چاہیے تاکہ شہریوں کو بڑے پردے پر فلم دیکھنے اور طبع تفریح فراہم کرنے والے سینما بےجا پابندیوں کی زد میں نہ آئیں۔