اسٹیٹ بینک نے آسان موبائل اکاؤنٹ اسکیم متعارف کروا دی

اسٹیٹ بینک آف پاکستان نے 13 دسمبر 2021 کو نئی اسکیم آسان موبائل اکاؤنٹ متعارف کرا دی ہے۔ یہ اسکیم قومی مالی شمولیت حکمت عملی کے تحت تیار کی گئی ہے۔

اسٹیٹ بینک کے حکام کا کہنا ہے کہ اس اسکیم کا مقصد برانچ لیس بینکنگ میں ریمورٹ اکاؤنٹ میں مزید آسانی پیدا کرنا ہے۔ اس کا مطلب یہ ہے کہ صارفین اپنے گھر پر بیٹھ کر برانچ لیس بینکنگ کے شریک فراہم کنندگان کے ساتھ اپنے اکاؤنٹ کھول سکیں گے اور آپریٹ کرسکیں گے۔ اور انہیں برانچز میں جانے کی ضرورت نہیں ہوگی۔

یہ بھی پڑھیے

کراچی کا جوڑیا بازار، مہنگائی کے ستائے عوام کے لیے سہولت کا مسکن

نومبر میں پاکستانی برآمدات جنوبی ایشیا میں سب سے زیادہ

یہ طریقہ کار اسٹیٹ بینک ، پاکستان ٹیلی کمیونیکیشن اتھارٹی (پی ٹی اے) ، نیشنل ڈیٹا بیس اینڈ رجسٹریشن اتھارٹی (نادرا) ، برانچ لیس بینکنگ کے 13 پرووائیڈرز ، تمام سیلولرز فون آپریٹرز (سی ایم اوز) اور ورچوئل ریمی ٹنس گیٹ وے (وی آر جے) کے اشتراک سے تیار کیا گیا ہے۔ آسان موبائل اکاؤنٹ کے لیے برانچ لیس بینکنگ پرووائیڈرز اور سیلولر فون آپریٹرز ایک انٹرا آپریبل پلیٹ فارم مہیا کرنے کے لیے مل کر کام کر رہے ہیں تاکہ کوئی بھی پاکستانی بینک اکاؤنٹ کھول سکے۔

آسان موبائل اکاؤنٹ کم آمدنی والے طبقات تک ،جن کی انٹرنیٹ تک رسائی نہیں ، پہنچنے میں اہم کردار ادا کرے گا۔ مزید یہ کہ آسان موبائل اکاؤنٹ خواتین صارفین کو آن بورڈ لانے کے لیے بھی ایک بہترین مصرف ہو گا۔