میسی اور بارسلونا کی 21 سال بعد راہیں جدا
کلب اور اسٹار فٹبالر میں نیا معاہدہ نہ ہونے پر میسی نے کلب کو خیر آباد کہہ دیا۔
ارجنٹینا کے اسٹار فٹبالر لیونل میسی نے 21 سال بعد بارسلونا کلب سے اپنی راہیں جدا کرلی ہیں۔ فٹبال کلب نے تصدیق کرتے ہوئے کہا کہ اسٹار فٹبالر سے نیا معاہدہ نہیں ہوسکا۔ میسی کی ہسپانوی کلب کو چھوڑنے کی خبر پاکستان سمیت دنیا بھر میں ٹوئٹر پر ٹاپ ٹرینڈ بن گئی ہے۔
اسپین کے مشہور فٹبال کلب بارسلونا اور اسٹار فٹبالر لیونل میسی کے درمیان گزشتہ ماہ جولائی میں معاہدہ ختم ہوگیا تھا جس کے بعد دونوں فریقین میں نئے معاہدے پر بات چیت جاری تھی۔ کلب نے اس وقت کہا تھا کہ میسی کم معاوضے پر نیا معاہدہ کرنے پر راضی ہوگئے ہیں، معاہدے کو گزشتہ روز حتمی شکل دینی تھی لیکن میڈیا رپورٹس کے مطابق لیونل میسی کے معاشی معاملات اور کلب کی کچھ شرائط کے باعث یہ معاہدہ تحریری طور پر نہیں ہوسکا جس کے بعد لیونل میسی نے 2 دہائیوں کے بعد کلب کو خیر آباد کہہ دیا۔
LATEST NEWS | Leo #Messi will not continue with FC Barcelona
— FC Barcelona (@FCBarcelona) August 5, 2021
بارسلونا کلب کی انتظامیہ نے لیونل میسی کی کلب کے لیے دی گئی خدمات کو سراہتے ہوئے ان کے مستقبل کے لیے نیک خواہشات کا اظہار کیا ہے۔ کلب کی طرف سے اسٹار فٹبالر کو خراج تحسین پیش کرنے کے لیے ٹوئٹر ہینڈل پر کلب کے ساتھ جڑی ان کی یادوں کو تصاویر اور ویڈیو کی شکل میں شیئر کیا گیا۔
Thank you, Leo. pic.twitter.com/cdS9xWe8Me
— FC Barcelona (@FCBarcelona) August 5, 2021
یہ بھی پڑھیے
ارجنٹینا کے اسٹار فٹبالر بچپن میں جسمانی معذوری کا شکار تھے لیکن ان میں فٹبال کھیلنے کی حد سے زیادہ چاہ ہونے پر بارسلونا کلب نے ان کا علاج کروایا تھا۔ لیونل میسی نے اپنے کیئریئر کا آغاز بھی بارسلونا سے کیا تھا۔ انہوں نے سن 2000 میں ہسپانوی کلب کی یوتھ ٹیم کو جوائن کیا تھا۔
بارسلونا کا لیونل میسی پر اعتبار اور اسٹار فٹبالر کی اپنے کلب سے محبت نے دونوں کو کامیابی کی بلندیوں پر پہنچایا۔ لیونل میسی نے بارسلونا کلب کو 4 مرتبہ چیمپئینز لیگ ٹورنامنٹ میں کامیابی دلوائی۔ میسی کو دنیا کا بہترین فٹبالر ہونے پر 6 بار بیلون ڈی سے بھی نوازا جا چکا ہے۔
Barcelona CONFIRM Lionel Messi will NOT sign new contract as he WALKS AWAY after 21 years https://t.co/Yt7e4bLK9p pic.twitter.com/kjTwzKsjI1
— Daily Mail Online (@MailOnline) August 5, 2021
کلب اور اسٹار فٹبالر کے راستے الگ ہونے پر سوشل میڈیا پر بارسلونا اور میسی ٹاپ ٹرینڈ بن گئے ہیں۔ کچھ شائقین فٹبال اس خبر پر افسوس کا اظہار کررہے ہیں تو کچھ تجسس میں ہیں کہ اب اسٹار فٹبالر کون سے کلب کی نمائندگی کریں گے۔
غیر ملکی میڈیا کا کہنا ہے کہ شاید اب اسٹار فٹبالر فرانس کے فٹبال کلب پی ایس جی سے نیا معاہدہ کریں گے لیکن اس کا حتمی فیصلہ کلب کو ہی کرنا ہوگا کہ کیا وہ میسی کو خریدنے کی صلاحیت رکھتے ہیں؟
