واپڈا اور بجلی کمپنیوں کی نجکاری کسی صورت قبول نہیں، سی بی اے یونین

سکھر: آل پاکستان واپڈا ہائیڈرو الیکڑک سینٹرل لیبر یونین ( سی بی اے ) سکھر ریجن کے چیئرمین شجاعت علی گھمرو نے کہا ہے کے حکومت واپڈا اور بجلی کمپنیوں کی نجکاری کا خیال دل سے نکال دے۔

ان خیالات کا اظہار انہوں نے نیوز 360 سے خصوصی گفتگو کرتے ہوئے کیا۔ شجاعت علی گھمرو کا کہنا تھا کہ واپڈا کے لاکھوں ملازمین اس نجکاری کو روکنے کیلیے سر دھڑ کی بازی لگا دیں گے مگر نجکاری نہیں ہونے دیں گے۔

یہ بھی پڑھیے

سکھر میں کلین اینڈ گرین صفائی مہم ناکام ، شہر بھر میں گندگی کے ڈھیر

ان کا کہنا تھا مرکزی کال پر ملک کے دیگر شہروں کی طرح سکھر ریجن کے زیر اہتمام سیپکو ملازمین واپڈا کی نجکاری کے خلاف اور جائز مطالبات کے حصول کیلئے 3 مارچ کو بھرپور یوم احتجاج منائے گی۔

چیئرمین سی بی اے یونین کا مزید کہنا تھا کہ واپڈا کے ملازمین اپنی جانوں پر کھیل کر پورے ملک میں بجلی کی سپلائی جاری رکھے ہوئے ہیں اور پاک فوج کے بعد ملک و قوم کے لیے خدمات انجام دیتے ہوئے واپڈا ملازمین شہید ہوتے ہیں ان کی جانوں کی قربانی کے باوجود حکومت کی جانب سے واپڈا کی نجکاری کا فیصلہ کسی طور قبول نہیں۔

انہوں نے حکومت سے مطالبہ کی کہ وہ فوری طور پر واپڈا کی نجکاری کا فیصلہ ترک کردے ورنہ ملک بھر کے لاکھوں واپڈا ملازمین سڑکوں پر ہونگے۔