ڈونلڈ ٹرمپ پر مشکلات کے پہاڑ ٹوٹ پڑے

حامیوں کی جانب سے کیپٹل ہِل پر حملے کے بعد صدر ڈونلڈ ٹرمپ مشکلات کی زد میں آگئے ہیں۔ سماجی، کاروباری اور سیاسی طور پر ڈونلڈ ٹرمپ کو نقصان پہنچنے لگا ہے۔

بدھ کو ڈونلڈ ٹرمپ کے حامیوں کے حملے نے امریکی صدر کے لیے مسائل پیدا کردیئے ہیں۔ اِن مسائل کا آغاز اُس وقت ہوا جب سماجی رابطوں کی ویب سائٹ ٹوئٹر نے ڈونلڈ ٹرمپ کا ویریفائڈ اکاؤنٹ اب مستقبل بنیادوں پرمعطل کردیا گیا ہے۔ اِس سے قبل اُن کا ٹوئٹر اکاؤنٹ 12 گھنٹوں کے لیے معطل کیا گیا تھا۔ ٹوئٹر کا کہنا ہے کہ اُسے خدشہ ہے کہ ڈونلڈ ٹرمپ تشدد کو بڑھاوا دے سکتے ہیں۔

اس سے پہلے بدھ کو ٹوئٹر انتظامیہ نے ڈونلڈ ٹرمپ کا اکاؤنٹ 12 گھنٹے کے لیے معطل کرنے کے ساتھ ان کی ایک ویڈیو اور تین ٹوئٹس ڈیلیٹ کردیئے تھے۔ کمپنی نے یہ انتباہ بھی دیا تھا کہ ان کے اکاؤنٹ کو ہمیشہ کے لیے بند کیا جاسکتا ہے۔ ٹوئٹر انتظامیہ کا موقف ہے کہ ڈونلڈ ٹرمپ بار بار کمپنی کے ضوابط کی خلاف ورزی کے مرتکب ہورہے ہیں۔

امریکی صدر کے اکاؤنٹ کو نہ صرف ٹوئٹر نے بند کیا ہے بلکہ اس سے قبل فیس بک نے بھی پالیسی کی خلاف ورزی پران کا اکاؤنٹ معطل کیا تھا۔ جمعرات کو فیس بک کے بانی مارک زکربرگ نے بیان دیا تھا کہ نومنتخب امریکی صدرجوبائیڈن کی حلف برداری تک ڈونلڈ ٹرمپ فیس بک اور انسٹاگرام کا استعمال نہیں کرپائیں گے۔

امریکی ایوان نمائندگان کی اسپیکر نینسی پیلوسی نے ٹوئٹر پیغام میں کہا ہے کہ ‘صدر کی خطرناک کارروائیوں کی وجہ سے انہیں فوری طور پرعہدے سے ہٹانا ضروری ہے۔

The President’s dangerous acts necessitate his immediate removal from office. We look forward to hearing from the Vice President as soon as possible and to receiving a positive answer as to whether he and the Cabinet will honor their oath to the Constitution and to Americans.

— Nancy Pelosi (@SpeakerPelosi) January 8, 2021

ٹوئٹراور فیس بک پراکاؤنٹ کی معطلی نے ڈونلڈ ٹرمپ کو سماجی طورپردھچکہ پہنچایا ہے۔ لیکن یہ سلسلہ ختم نہیں ہوا اور صدارت کی مدت ختم ہونے سے چند روز قبل ہی امریکی صدر کے مواخذے کے مطالبات بھی کیے جانے لگے ہیں۔ ڈیموکریٹ رہنما سینیٹر چک شومر نے ڈونلڈ ٹرمپ کے صدارتی اختیارات فوری طورپرختم کرنے کا مطالبہ کیا ہے۔

انہوں نے کہا کہ 25 ویں آئینی ترمیم کے تحت اختیارات عارضی یا مستقل طور پر صدر سے نائب صدر کو منتقل ہوجاتے ہیں۔ نائب صدر مائیک پینس کو 25 ویں ترمیم کا استعمال کرنا چاہیے۔ اگرکابینہ اورنائب صدر اِس اقدام سے انکار کریں تو کانگریس کو اجلاس بلا کرصدرکا مواخذہ شروع کرنا چاہیے۔

یہ بھی پڑھیے

ڈونلڈ ٹرمپ نے جاتے جاتے امریکی جمہوریت کی چولیں ہلادیں

صدرڈونلڈ ٹرمپ کا اس سے پہلے دسمبر 2019 میں دوبارہ منتخب ہونے کے امکانات بڑھانے کے لیے یوکرین سے مدد طلب کرنے کے الزام پر بھی  مواخذہ کیا جاچکا ہے۔ سماجی کے بعد سیاسی اعتبار سے یہ دھچکہ بھی شاید ڈونلڈ ٹرمپ برداشت کرجائیں لیکن بات یہاں بھی نہیں رکی ہے۔

اس کے علاوہ ڈونلڈ ٹرمپ کو کاروباری لحاظ سے بھی جھٹکا لگا ہے جو شاید گزرتے وقت کے ساتھ شدت اختیار کرجائے۔ آن لائن خریداری کی کمپنی شوپیفائی نے بھی ان کے خلاف قدم اٹھا لیا ہے۔ شوپیفائی نے امریکی صدر کے دونوں اسٹورز کو پلیٹ فارم سے ہٹا دیا ہے۔ ایک اسٹور پران کی سیاسی مہمات سے متعلق سامان فروخت کیا جاتا تھا جبکہ دوسرا ان کا ذاتی برانڈڈ اسٹور(ٹرمپ اسٹور) تھا جو ٹرمپ آرگنائزیشن کے زیرانتظام تھا۔