مریم نواز اپنے والد نواز شریف کے ساتھ وطن واپس آئیں گی ، ذرائع نیوز 360

مسلم لیگ ن کی نائب صدر کو پاسپورٹ واپس کرنے کے لاہور ہائی کورٹ کے حکم کے بعد مریم نواز نے بیرون ملک روانگی کی تیاریاں شروع کردی گئی ہیں جب کہ امکان ظاہر کیا جا رہا ہے کہ مریم نواز اپنے والد سابق وزیراعظم نواز شریف کے ہمراہ وطن واپس آئیں گی۔

نیوز 360 کو ن لیگی ذرائع نے بتایا ہے کہ مریم نواز پاسپورٹ ملنے کے بعد رواں ماہ کے دوران ہی لندن روانہ ہوں گی، اس سلسلے میں عدالتی حکم جاری ہوتے ہی تیاریاں شروع کردی گئی ہیں، جس کے مطابق مریم نواز کی 2 علیحدہ پروازوں پر ٹکٹیں آج ہی بک کروائی جائیں گی اور پاسپورٹ ملنے کے بعد مریم نواز کی بیرون ملک روانگی کے تمام قانونی تقاضے مکمل کیے جائیں گے۔

یہ بھی پڑھیے

منظور وسان کی عام انتخابات میں ایک سال کے التوا کی پیشگوئی

اسحاق ڈار کا ڈالر اور پیٹرول 170 روپے تک لانے کا دعویٰ

نیوز 360 کے ذرائع کا کہنا ہے کہ مریم نواز کا پاسپورٹ بدھ کے روز تک واپس ملنے کا امکان ہے، جس پر برطانیہ کا ویزا لگا ہوا ہے۔ لیگی رہنما مریم نواز تقریباً 3 سال کے بعد اپنے والد سے ملیں گی۔ مریم نواز اپنے والد کی عیادت اور اپنی سرجری کے لیے پہلے بھی لندن جانا چاہتی تھیں۔ علاوہ ازیں وہ پاسپورٹ نہ ہونے کے باعث لندن میں اپنے بیٹے جنید صفدر کی تقریب نکاح میں بھی شریک نہیں ہو سکی تھیں۔

پارٹی ذرائع نے نیوز 360 کو بتایا ہے کہ مریم نواز لندن میں طویل عرصے سے التوا کا شکار اپنی سرجری کے لیے بھی معالجین سے ملنے کے علاوہ اپنے والد اور بھائیوں کے ساتھ کچھ وقت گزاریں گی۔ مریم نواز اپنے والد، سابق وزیراعظم نواز شریف کے ساتھ ملکی سیاسی و معاشی معاملات پر تفصیلی تبادلہ خیال بھی کریں گی۔

لیگی ذرائع کا کہنا ہے کہ مریم نواز لندن روانگی سے قبل پارٹی رہنماؤں سے مشاورت کریں گی اور نواز شریف کو پارٹی کی اجتماعی رائے اور سیاسی حکمت عملی پر بریف کریں گی۔

علاوہ ازیں مریم نواز اپنے والد کو جلد از جلد وطن واپسی پر قائل کریں گی۔ اس سلسلے میں امکان ظاہر کیا جا رہا ہے کہ مریم نواز، نواز شریف کے ہمراہ وطن واپس آئیں گی۔