بجلی ہونا یا نہ ہونا دونوں ہی دردسر
وفاقی وزیر توانائی حماد اظہر نے واضح کیا ہے کہ لوڈشیڈنگ کی وجہ بجلی کی پیداوار میں کمی نہیں ہے۔
وفاقی وزیر توانائی حماد اظہر نے واضح کیا ہے کہ ملک میں بجلی موجود ہے اور لوڈشیڈنگ کی وجہ بجلی کی کمی نہیں ہے۔ جس کے بعد عوام نے ملک میں بجلی ہونے یا نہ ہونے دونوں کو ہی دردسر قرار دیا ہے۔
منگل کے روز سے پاکستان کے مختلف شہروں میں 6 سے 12 گھنٹوں تک غیر اعلانیہ لوڈشیڈنگ شروع ہوگئی تھی جس کی وجہ بجلی کی طلب اور پیداوار کا فرق بتایا جارہا تھا۔ نیشنل الیکٹرک پاور ریگولیٹری اتھارٹی (نیپرا) نے ملک بھر میں بجلی کی اضافی لوڈشیڈنگ کا نوٹس لیتے ہوئے بجلی کی تقسیم کار کمپنیوں سے جمعے کو جواب طلب کرلیا ہے۔
بدھ کے روز وزارت توانائی کے آفیشل ٹوئٹر اکاؤنٹ سے جاری کردہ بیان میں کہا گیا کہ تربیلا ڈیم میں پانی کے اخراج میں کمی کے باعث بجلی کی پیداوار میں 3 ہزار میگاواٹ کی کمی واقع ہوئی لیکن آنے والے دنوں میں اس کمی کو پورا کرلیا جائے گا۔
تربیلا اور منگلا سے اس وقت 3300میگاواٹ کی کم بجلی پیدا ہورہی ہے جوکہ کچھ دنوں میں بحال ہو جائے گی اس وقت ملک کی کل بجلی کی ڈیمانڈ 24100میگاواٹ جبکہ سسٹم میں موجود بجلی کی پیداوار 22600میگاواٹ ہے شارٹ فال 1500میگاواٹ ہے بجلی صارفین سے بجلی استعمال میں اعتدال کی گزارش ہے اور
— Ministry of Energy (@MoWP15) June 9, 2021
وزارت توانائی نے ملک میں سسٹم کی حفاظت کے لیے کی جانے والی لوڈ مینجمنٹ کی وجہ سے صارفین سے غیر اعلانیہ لوڈشیڈنگ پر معذرت بھی کی۔
یہ بھی پڑھیے
آئی پی پیز کو 89 ارب 20 کروڑ روپے کی پہلی قسط ادا
جس کے بعد بدھ کے روز ہی وفاقی وزیر توانائی حماد اظہر نے گزشتہ 48 گھنٹوں کے دوران ہونے والی غیر اعلانیہ لوڈشیڈنگ پر وضاحت کی۔ ٹوئٹر پر جاری پیغام میں حماد اظہر نے لکھا کہ ’چند پلانٹس کی تکنیکی بندش کی وجہ سے ملک میں ایک ہزار میگاواٹ کا شارٹ فال پیدا ہوا جس کے باعث غیر اعلانیہ لوڈ شیڈنگ شروع ہوگئی۔‘
Average shortfall of 1000 MW has arisen since last 48 hours due to rehabilitation in a major hydel plant and outages in a few thermal plants.
Tarbela will be back online in 4-6 days (3000 MW) and efforts made to add 1100 MW from alternative plants by tonight to plug shortfall. https://t.co/vNFMOYtlaf
— Hammad Azhar (@Hammad_Azhar) June 9, 2021
انہوں نے لکھا کہ ’متبادل ذرائع سے سسٹم میں 1100 میگاواٹ بجلی مہیا کرنے کی کوششیں کی گئیں ہیں تاہم آج اس لوڈشیڈنگ پر قابو پالیا جائے گا۔ تربیلا پاور پلانٹ سے اگلے 4 سے 6 روز میں 3 ہزار میگاواٹ بجلی سسٹم میں دوبارہ شامل ہوجائے گی۔‘
جس کے بعد حماد اظہر نے اپنے ایک ویڈیو پیغام میں واضح کیا کہ اس لوڈشیڈنگ کی وجہ بجلی کی پیداوار میں کمی قطعی نہیں ہے۔ انہوں نے کہا کہ ’ہزاروں میگاواٹ بجلی پورے سال ہمارے استعمال میں بھی نہیں آتی۔ ماضی میں کیے گئے معاہدوں کے باعث ان غیراستعمال شدہ میگاواٹ بجلی کی مد میں مکمل رقم کرایہ کی طور پر ادا کرنی ہوتی ہے۔‘
وفاقی وزیر توانائی جناب @Hammad_Azhar کا بجلی کی حالیہ صورتحال اور اس ضمن میں کئے جانے والے اقدامات پر اہم بیان pic.twitter.com/SKh3wsWew0
— Ministry of Energy (@MoWP15) June 9, 2021
حماد اظہر کے اس بیان کے بعد عوام نے بجلی ہونے یا نہ ہونے دونوں کو ہی دردسر قرار دیا ہے۔ عوام کا کہنا ہے کہ لوڈشیڈنگ تواتر سے ہوتی رہے تو ایسی بجلی موجود ہونے کا کیا فائدہ؟
