ویڈیو کے بدلے ویڈیو لیک ہوگی، صفدر اعوان کی دھمکی

سابق گورنر سندھ کے مبینہ ویڈیو اسکینڈل کے بعد سے مسلم لیگ (ن) کے رہنماؤں اور میڈیا پر مکمل خاموشی چھائی ہوئی ہے۔

سابق گورنر سندھ محمد زبیر کے مبینہ ویڈیو اسکینڈل کے بعد سوشل میڈیا پر نئی بحث چھڑ گئی ہے، مین اسٹریم میڈیا پر اب تک اس متعلق کوئی بات نہیں کی جارہی۔

مسلم لیگ (ن) کی رہنما مریم نواز کے شوہر اور سابق وزیراعظم نواز شریف کے داماد کیپٹن (ریٹائرڈ) صفدر نے اس حوالے سے نہایت سادہ انداز میں بڑی بات کہہ دی۔

یہ بھی پڑھیے

سابق گورنر زبیر عمر کی ویڈیو کا معاملہ، ٹی وی چینلز کی پراسرار خاموشی

صفدر اعوان نے میڈیا سے گفتگو کرتے ہوئے کہا کہ "لوگ ڈرے ہوئے ہیں، او بھائی نہ ڈرو، فلموں سے کچھ نہیں ہوتا، ہر ایک شخص کی فلم بنی ہوئی ہے، جرات سے کہو ہاں ہے فلم، ہم بھی آپ کی چلائیں گے”۔

صفدر اعوان کی ویڈیو کو ری ٹویٹ کرتے ہوئے پی ٹی آئی ویمن ونگ کی ضلعی عہدیدار نازیہ ربانی نے کہا کہ "میرے پاس الفاظ نہیں ہیں، سینما ہال ہی نہ کھول لیں ن لیگ والے”۔

کچھ دن قبل لیگی رہنما محمد زبیر کی ایک متنازع ویڈیو وائرل ہونے کے بعد سے سوشل میڈیا پر مختلف سوالات اٹھائے جارہے ہیں۔

کیپٹن (ر) صفدر کا یہ کہنا کہ ہر ایک کی فلم بنی ہوئی ہے نہایت معنی خیز بات ہے، قومی سیاست میں اس قسم کے اسکینڈلز ماضی میں بھی منظرعام پر آتے رہے ہیں۔

رہنما مسلم لیگ (ن) مریم نواز بھی اپنے شوہر صفدر اعوان کی طرح محمد زبیر کی حمایت میں سامنے آگئی ہیں، انہوں نے بیان دیا ہے کہ محمد زبیر اُن کے اور پارٹی سربراہ میاں نواز شریف کے ترجمان رہیں گے۔

اس بات کا فیصلہ ہمارے منتخب نمائندوں کو خود کرنا چاہیے کہ وہ پارلیمنٹ میں بیٹھنے کے لیے آئینی شقوں 62 اور 63 کے تحت صادق اور امین ہیں بھی یا نہیں۔

Facebook Comments Box