اسلام آباد ہائیکورٹ سے این اے 246 کی نشست خالی قرار دینے کا نوٹی فیکیشن معطل

اسلام آباد ہائیکورٹ نے قومی اسمبلی (این اے) 246 لیاری کراچی کی نشست خالی قرار دینے کا نوٹی فیکیشن معطل کر دیا۔

ہائی کورٹ کے چیف جسٹس اطہر من اللہ نے پی ٹی آئی ایم این اے شکور شاد استعفیٰ منظوری کے خلاف درخواست پر سماعت کی۔

درخواست گزار نے بذریعہ وکیل استدعا کی کہ میں نے قومی اسمبلی کی نشست سے استعفیٰ نہیں دیا، پارٹی ہیڈ آفس کے کمپیوٹر آپریٹر کے لکھے استعفوں پر 123 ارکان سے دستخط لئے گئے، استعفے اسپیکر کو بھیجے نہ نام لکھا، نہ تاریخ ڈالی۔

یہ بھی پڑھیے

شیریں مزاری کیس: اسلام آباد ہائی کورٹ نے وزیراعظم کو انتباہ جاری کردیا

الیکشن کمیشن تمام جماعتوں کے کیسز برابری کی بنیاد پر دیکھے، اسلام آباد ہائی کورٹ

پی ٹی آئی نے بتایا تھا کہ یہ استعفے پارٹی ڈسپلن کو برقرار رکھنے کے لیے ہیں، میں نے صرف عمران خان سے اظہار یک جہتی اور سیاسی مقاصد کیلئے دستخط کیے۔

عدالت نے استفسار کیا کہ کیا آپ کو ذاتی حیثیت میں اسپیکر قومی اسمبلی نے بلایا تھا؟ ۔ وکیل نے جواب دیا کہ ایک نوٹس آیا ، مگر یہ پیش نہیں ہوئے تھے۔

عدالت نے ریمارکس دیے کہ اس کے باوجود اسپیکر قومی اسمبلی نے استعفیٰ قبول کیا۔ عدالت نے اسپیکر اور قومی اسمبلی سیکریٹریٹ کو نوٹسز جاری کرتے ہوئے جواب طلب کرلیا۔

عدالت نے الیکشن کمیشن کا نوٹیفکیشن معطل کرتے ہوئے کمیشن کو بھی نوٹس جاری کرکے دو ہفتوں میں جواب طلب کرلیا۔

اسلام آباد ہائیکورٹ نے عبدالشکور شاد کو اسمبلی اجلاس اور کارروائی میں شامل ہونے کی ہدایت کرتے ہوئے ان کے استعفے کی منظوری کا نوٹیفکیشن معطل کردیا۔