پشاور میں محرم کے پہلے 15 ایام کیلئے ڈبل سواری پر پابندی عائد

حکام نے صوبائی دارالحکومت پشاور اور دیگر شہروں میں محرم کے دوران امن و امان کی صورتحال کو برقرار رکھنے کے لیے حفاظتی اقدامات کے تحت دفعہ 144، افغان مہاجرین کے شہر میں داخلے اور 15 دنوں کے لیے ہتھیاروں کی نمائش پر پابندی عائد کر دی۔

پشاور کی ضلعی انتظامیہ نے توہین آمیز مواد لکھنے اور شائع کرنے پر بھی پابندی لگا دی ہے۔

مزید برآں، گاڑی اور موٹر سائیکل کرائے پر لینے، بغیر نمبر پلیٹ والی گاڑیوں کے استعمال اور جلوس کے راستوں کے گردونواح میں عمارتوں اور گھروں کی چھتوں پر کھڑے ہونے پر بھی پابندی ہوگی۔

یہ بھی پڑھیے

ای سی پی نے خیبرپختونخوا میں بلدیاتی انتخابات کا شیڈول جاری کر دیا

بلاول بھٹو زرداری کا میئر کراچی کی طرح پورے ملک سے الیکشن جیتنے کے عزم کا اظہار

ضلعی انتظامیہ کی جانب سے جاری نوٹیفکیشن میں کہا گیا کہ اسلحہ کی نمائش اور لے جانے، پشاور اور چھاؤنی کے علاقوں میں افغان مہاجرین کے داخلے، پٹاخوں کی فروخت اور استعمال پر بھی پابندی عائد کر دی گئی ہے۔

ڈی آئی خان میں انتظامات کو حتمی شکل دی جا رہی ہے۔

اس کے علاوہ کمشنر ظفر الاسلام نے کہا ہے کہ ڈیرہ اسماعیل خان اور ٹانک کے اضلاع میں محرم الحرام کے پرامن انعقاد کے لیے انتظامات کو حتمی شکل دی جا رہی ہے۔

کمشنر نے کہا کہ آئندہ ماہ محرم کے دوران امن کو یقینی بنانے کے لیے ’امن کمیٹیوں‘ اور پولیس سمیت سیکیورٹی محکموں کے تعاون سے تمام دستیاب وسائل بروئے کار لائے جائیں گے۔

انہوں نے کہا کہ ڈی آئی خان پولیس ڈیپارٹمنٹ نے اس سلسلے میں تمام انتظامات کو حتمی شکل دے دی ہے کیونکہ محرم کے دوران ضلع میں امن کو یقینی بنانے کے لیے 7000 سے زائد افسران اور اہلکار ڈیوٹی سرانجام دیں گے۔

علاوہ ازیں کمشنر نے کہا کہ علاقے میں عوامی فلاح و بہبود کے منصوبوں کی تکمیل ان کی ترجیح ہوگی تاکہ عوام ان منصوبوں سے مستفید ہو سکیں۔

انہوں نے مزید کہا ہے کہ ڈیرہ اسماعیل خان، ٹانک اور جنوبی وزیرستان میں عوامی فلاح و بہبود کے منصوبوں کی بروقت تکمیل کے لیے تمام دستیاب وسائل بروئے کار لائے جائیں گے۔