اے ٹی سی کا عمران خان کو جناح ہاؤس آتشزدگی کیس میں شامل تفتیش ہونے کا حکم
اینٹی ٹیررسٹ کورٹ نے چیئرمین تحریک انصاف کو 14 جولائی کو عدالت میں پیش ہونے کا حکم دیا ہے۔
لاہور کی انسداد دہشت گردی کی خصوصی عدالت نے پاکستان تحریک انصاف (پی ٹی آئی) کے چیئرمین عمران خان کو کور کمانڈر ہاؤس (جناح ہاؤس) میں توڑ پھوڑ اور جلاؤ گھیراؤ سمیت 5 مقدمات کی جاری تحقیقات میں سرگرمی سے حصہ لینے کا حکم جاری کیا ہے۔
جمعہ کو عدالتی کارروائی کے دوران جسٹس اعجاز احمد بٹر نے کیس کی سماعت کی اور پی ٹی آئی سربراہ کی جانب سے مذکورہ کیسز کے حوالے سے تفتیشی حکام سے تعاون نہ کرنے پر برہمی کا اظہار کیا۔
یہ بھی پڑھیے
سویڈن میں قرآن پاک کی بےحرمتی کے خلاف سکھر ڈیویلپمنٹ الائنس کی زیرقیادت احتجاجی ریلی کا انعقاد
احتساب عدالت نے نواز شریف کو پلاٹ الاٹمنٹ کیس سے بری قرار دے دیا
عمران خان کی جانب سے تحقیقاتی عمل سے مسلسل غیر حاضری پر تشویش کا اظہار کرتے ہوئے جسٹس اعجاز احمد بٹر نے الزامات کی شفاف اور جامع انکوائری کو یقینی بنانے کے لیے ان کی شمولیت کی اہمیت پر زور دیا۔
انسداد دہشتگردی کی خصوصی عدالت نے عمران خان کے تعاون کی اہمیت پر زور دیتے ہوئے چیئرمین تحریک انصاف کو حکم دیا کہ وہ 14 جولائی تک جناح ہاؤس حملہ کیس میں خود کو تحقیقات کے لیے پیش کریں ، تاکہ قانون اور انصاف کے تقاضے پورے کیے جاسکیں۔
مزید برآں، عدالت نے ان کی ضمانت میں 21 جولائی تک توسیع کرتے ہوئے انہیں عدالتی ہدایات پر عمل کرنے کے لیے اضافی وقت دے دیا۔
