جامعہ این ای ڈی کے تحت اکتیسواں سالانہ جلسہ تقسیمِ اسناد 2022

جامعہ این ای ڈی کے چانسلر اور گورنر سندھ کامران خان ٹیسوری نے کہا ہے کہ یومِ تقسیم اسناد ، ناصرف طالب علموں بلکہ والدین اور اساتذہ کی کامیابی کا دن ہے، جامعہ این ای ڈی اور اس کا تھر کیمپس بہترین کام کررہا ہے، فارغ التحصیل طلبا جامعہ کی بہتری میں اپنا کردار  ادا کرتے رہیں، طالبات کو انجینئرنگ میں آگے بڑھتا دیکھ کر خوشی محسوس ہورہی ہے. این ای ڈی 19ویں پی ایچ ڈی ڈگری دینے والا واحد ”انجینئرنگ جامعہ“ ہے۔ پچھلے برس انجینئرنگ سیکٹر جامعات میں 18 پی ایچ ڈی ڈگری دینے والا پہلا ادارہ این ای ڈی تھا۔ ادارے سے وابستہ اور سابقہ ہر فرد کا شکریہ جنہوں نے سو برس جامعہ این ای ڈی کو ترقی کی راہوں پر گامزن رکھا۔

ان خیالات کا اظہار چانسلر/ گورنر سندھ کامران ٹیسوری ، پرو چانسلر انجینئرنگ جامعات ضیا عباس شاہ ، سربراہ ہائر ایجوکیشن کمیشن پروفیسر ڈاکٹر مختار احمد ، شیخ الجامعہ این ای ڈی پروفیسر ڈاکٹر سروش حشمت لودھی ، معین الجامعہ پروفیسر ڈاکٹر محمد طفیل اور انڈس ہاسپٹل اینڈ ہیلتھ نیٹ ورک کے سی ای او ڈاکٹر عبدالباری خان نے جامعہ این ای ڈی کے اکتیسویں سالانہ جلسہ تقسیمِ اسناد 2022 میں کیا۔

یہ بھی پڑھیے

کم عمر گڑیا اور مسکان کس خوف کی وجہ سے گھر چھوڑنے پر مجبور ہوئیں ؟

تفصیلات کے مطابق گورنرسندھ/ چانسلر جامعات کامران ٹیسوری کا صدارت کرتے ہوئے کہنا تھا کہ جامعہ این ای ڈی ملک کی بہترین جامعات میں سے ایک ہے جو کہ ناصرف تعلیمی بلکہ ملکی ترقی میں بھی کردار ادا کررہی ہے۔ تعلیمی اداروں میں کوالٹی ایجوکیشن اور تحقیق کے ذریعے دنیا سے مقابلہ کیا جاتا ہے اور این ای ڈی اس حوالے سے منفرد مقام رکھتی ہے. نوجوانوں سے بہت اُمیدیں ہیں، طالبات کو انجینئرنگ میں آگے بڑھتا دیکھ کر خوشی ہورہی ہے. آپ سو برس سے انجینئرز تخلیق کرنے والی ملک کی مایہ ناز یونیورسٹی سے پاس آؤٹ ہورہے ہیں، جو انجینئرنگ کی دنیا کا بڑا نام ہے۔

ان کا کہنا تھا کہ آپ کا مستقبل،آپ کے ملک و قوم کا مستقبل ہے، خود کومحدود نہ کرتے ہوئے آگے بڑھتے جائیے۔

پرو چانسلر انجینئرنگ جامعات، ضیا عباس شاہ کا کہنا تھا کہ بحیثیت طالب علم، انسان تمام زندگی اپنی جامعہ سے وابستہ رہتا ہے، این ای ڈی یونی ورسٹی 100 برس سے پیشہ وارانہ تعلیم دے رہی ہے توآپ پر فرض ہے کہ آپ المنائی کی حیثیت سے اپنی جامعہ کی بہتری کے لیے کردار ادا کرتے رہیں۔

انہوں نے مزید کہا کہ میں شیخ الجامعہ پروفیسر ڈاکٹر سروش لودھی اور ان کی ٹیم کو مبارک باد دیتا ہوں جن کی بدولت جامعہ ترقی کی منازل طے کررہی ہے۔

اس موقعے پر خطاب کرتے ہوئے سربراہ ہائر ایجوکیشن کمیشن ڈاکٹر مختار احمد اور سیکریٹری یونی ورسٹی و بورڈز مرید راحموں کا کہناتھا کہ یومِ تقسیمِ اسناد دراصل محنت کے نتائج کا دن ہوتا ہے اور سب کی خوشی اس دن پر دیدنی ہوتی ہے.

کانووکیشن کی ابتدا میں استقبالیہ سے خطاب کرتے ہوئے شیخ الجامعہ پروفیسر ڈاکٹر سروش حشمت لودھی کا کہنا تھاکہ جامعہ این ای ڈی کو گزشتہ سال سو برس مکمل چکے ہیں، کانووکیشن کے موقعے پر یہ بتاتے ہوئے خوشی محسوس کررہا ہوں کہ پچھلے برس 18 پی ایچ ڈی ڈگری دینے والی ہم ملک پہلی ”انجینئرنگ جامعہ“ تھے جب کہ اس بار ہم بھی ہم 19 پی ایچ ڈگری اسکالرز دینے والی ہم واحد انجینئرنگ جامعہ ہیں.

پروفیسر حشمت لودھی کا کہنا تھا  کہ این ای ڈی کی تاریخ میں پہلی بار دونوں آنکھوں سے نابینا طالبہ حلیمہ سرور(ہیومنٹس) سے پاس آؤٹ ہورہی ہیں جس سے آئندہ نابینا طالب علموں کے لیے راستہ کھلے گا.

انہوں نے مزید کہا کہ ادارے سے وابستہ اور سابقہ ہر فرد کا شکریہ جنہوں نے ادارے کو ترقی کی راہوں پر گامزن رکھا۔

رجسٹرار سید غضنفر حسین کے مطابق اس جلسہ تقسیم اسناد 2022میں 19 اسکالرز کو ڈاکٹریٹ کی سند تفویض کی گئی جب کہ 2022 کے پاس آؤٹ گریجویٹ 2322 اور ماسٹرز کے طالب علموں کی تعداد 961 ہے.