پاکستانی کھلاڑی نے جیولن تھرو کے مقابلے میں طلائی تمغہ جیت لیا

ایران کے شہر مشہد میں منعقد ہونے والے ’امام رضا اتھلیٹکس چیمپئن شپ‘ کے ’جیولن تھرو‘ کے مقابلوں میں پاکستانی کھلاڑی ارشد ندیم نے سونے کا تمغہ جیت لیا ہے۔ ارشد ندیم نے نا صرف سونے کا تمغہ جیتا ہے بلکہ 86 اعشاریہ 38 میٹرز کی جیولن تھرو سے ’ساؤتھ ایشین گیمز‘ کے اپنے ہی سابقہ ریکارڈ کو توڑ دیا ہے۔ 

ایران میں سونے کا تمغہ جیتنے والے جیولن تھرو کے پاکستانی کھلاڑی ارشد ندیم ان دنوں ٹوکیو اولمپکس کی تیاریوں میں مصروف ہیں۔ ارشد ندیم اپنی تیاریوں کے دوسرے مرحلے میں 13 اپریل کو ترکی روانہ ہوں گے جہاں وہ قازقستان کے جیولن تھرو کوچ وکٹر کی زیر نگرانی 3 ہفتے کی ٹریننگ کریں گے۔

پاکستان کے صوبہ پنجاب کے وزیر کھیل رائے تیمور خان بھٹی نے نوجوان کھلاڑی ارشد ندیم کی شاندار کارکردگی پر انہیں خراج تحسین پیش کرتے ہوئے ان کے لیے نیک تمناؤں کا اظہار کیا ہے۔

یہ بھی پڑھیے

پاکستان میں کرکٹ کا ستارہ عروج پر

سماجی رابطوں کی ویب سائٹ ٹوئٹر پر جاری پیغام میں صوبائی وزیر نے ارشد ندیم کی حوصلہ افزائی کرتے ہوئے کہا ہے کہ ’محنت جاری رکھیں۔ پوری قوم کی دعائیں آپ کے ساتھ ہیں۔‘

شاباش ارشد ندیم! ایران میں ہونے والی امام علی رضا علیہ الاسلام اتھلیٹکس چیمپئن شپ جیولن ایونٹ میں گولڈ میڈل جیتنے پر مبارک باد۔86.38 میٹر کی تھرو سے آپ نے اپنا ریکارڈ بھی بہتر کیااور ملک کا نام روشن کیا۔محنت جاری رکھیں،انشاللہ ٹوکیو اولمپکس میں پوری قوم کی دعائیں آپ کے ساتھ ہیں pic.twitter.com/ntDhXCVGEP

— Rai Taimoor Khan Bhatti (@RaiTaimoorPTI) April 12, 2021

پاکستانی کھلاڑی ارشد ندیم نے نیپال کے شہر کٹھمنڈو میں 2019 میں 13ویں ’ساؤتھ ایشین گیمز‘ میں جیولن تھرو کے مقابلوں میں بھی سونے کا تمغہ جیتا تھا اور اپنی اس کارکردگی کی بدولت 2020 میں جاپان کے شہر ٹوکیو میں ہونے والے اولمپکس گیمز کے مقابلوں کے لیے کوالیفائی کیا تھا۔